Мин бәхетле гаиләм белән

15 май - Халыкара гаилә көне. Һәрбер дәүләтнең нигез ташы, дәвамчысы, тәрбиячесе булган бу ячейканың бөтенлеге, иминлеге җәмгыятебезнең тотрыклылыгын тәэмин итә. Әлеге бергәлекне саклау, татар гаиләләренең матур традицияләрен үстерү, аларның иҗади потенциалын ачу юнәлешендә Әлмәт муниципаль районының мәгариф идарәсе киң кырлы эшчәнлек алып бара.

Агымдагы елда районда беренче тапкыр татар гаиләләре арасында "Мин бәхетле гаиләм белән" дип исемләнгән бәйге игълан ителгән иде. Мәгариф идарәсе һәм Бөтендөнья татар конгрессының Әлмәт бүлеге каршысында эшләп килүче "Ак калфак" татар хатын-кызлар оешмасы бәйгенең оештыручылары булдылыр. 23 апрель көнне старт алган бәйгенең сайлап алу турлары 52, 27, 53, 45 нче балалар бакчаларында уздырылды.

Бәйгедә катнашучылар тамашачыларны һәм жюри әгъзаларын гаиләдәге матур традицияләре, мавыктыргыч һөнәрләре, буыннан-буынга тапшырылып килгән гаилә ядкәрләре белән таныштырдылар, татар халык ризыкларын пешерү серләрен чиштеләр, туган телебезнең бай мирасы - халык авыз иҗатын белүләрен күрсәттеләр. "Кайнар" ярышлардан соң финалга 8 гаилә чыкты. 15 май көнне 22 нче "Алсу" балалар бакчасында "Мин бәхетле гаиләм белән" бәйгесенең йомгаклау туры узды.

Шәһәребезнең бизәге булган, матурлыгы һәм төзеклеге белән сокландырган "Алсу" балалар бакчасына җыелу, ак калфаклы әниләр һәм кызлар, түбәтәйле әтиләр һәм малайлардан бөркелгән ихласлылык, җылылык күңелләрне дулкынландырды.

Район башкарма комитеты җитәкчесе урынбасары Резеда Заһретдинова, ӘДМХИ ректоры, Бөтендөнья татар конгрессының Әлмәт бүлеге җитәкчесе Ильяс Салахов финал уеннарында катнашучыларны тәбрикләп, чараның әһәмиятен, рухи кыйммәтен ассызыкладылар.

Финалга узган 8 гаилә арасыннан беренче өчлекне сайлап алу, әлбәттә, бик авыр булды. Әлеге бәйрәмнең төп оештыручысы, Мәгариф идарәсенең баш белгече Сирина Җиһаншина билгеләп узганча, аларның һәрберсе инде җиңүче. Бу талантлы, музыкаль, матур гаиләләргә сокланмый мөмкин түгел.

Шулай да, гомуми нәтиҗәләр буенча беренче урынга 36 нчы балалар бакчасыннан Мисбаховлар, икенче урынга Яңа Нәдер авылы балалар бакчасыннан Вафиннар, өченче урынга 35 нче балалар бакчасыннан Нуриевлар гаиләсе чыкты. Аларга "Девон-кредит" банкы ярдәме белән "Спортмастер" сәүдә челтәреннән әйберләр алу өчен 10 һәм 5әр меңлек сертификатлар тапшырылды.

"Иң зыялы татар гаиләсе" номинициясендә - Нәбиуллиннар(62 нче бакча), "Алтын куллы гаилә" номинациясендә - Вафиннар (22 нче бакча), "Иң музыкаль татар гаиләсе" номинациясендә - Сабирҗановлар(50 нче бакча), "Иң күп һөнәрле гаилә" номинациясендә - Дәминовлар (41 нче бакча), "Иң иҗади гаилә" номинациясендә - Шәймөхәммәтовлар (44 бакчасы) җиңүче булдылар.

Аларны Мәгариф идарәсе башлыгы урынбасары Инна Гайфуллина, "Девон-кредит" банкының тышкы элемтә буенча бүлек җитәкчесе Регина Сөнгатуллина тәбрикләде. Финалга чыгучыларның һәрберсенә бәйрәмнең иганәчеләре: "Алсу" балалар бакчасыннан гаилә фотолары төшкән сувенирлар, Әлмәт язучылар берлегеннән нефть төбәге иҗатчыларның әсәрләре тупланган "Илһам чишмәләре" җыентыгы, шәһәрнең мәдәният һәм ял паркыннан төрле аттракционнарда бергәләп күңел ачу өчен чакыру билетлары, "Стар-Синема" клубыннан кинога билетлар, "Альметьевский вестник" газетасыннан - 6 айга подписка, "Казанские аптеки" челтәреннән - гаиләләре сау- сәламәт булсын дип витаминнар комплексы, «Макдональдс» рестораны, «Сударыня» матурлык салоны, сәламәт яшәү клубы үзенең сертификатларын бүләк итте.

Гаилә бәйрәме фотога төшү, тәм-томнар белән табын артында бергәләп чәй эчү белән тәмамланды.

Без, киң татар җәмәгатьчелеге исеменнән, "Мин бәхетле гаиләм белән" бәйгесен оештыручыларга, аны уздыруга үзләреннән зур өлеш керткән Мәгариф идарәсе хезмәткәрләре, шәхсән Сирина Җиһаншинага, сайлап алу һәм финал ярышлары уздырылган балалар бакчалары коллективларына, иганәчеләргә олы рәхмәтебезне белдерәбез.

Матур башлангыч дәвамлы булсын иде.

Фәрдия Хәсәнова
Автор фотосы