Әлмәттә хоккей сезонын ябу тантанасы булды

13 майда “Нефтьче”мәдәният сараенда хоккей бәйрәме булды. 2013-2014 ел сезонын ябу тантанасына йөзләрчә хоккейчылыр, аларның әти-әниләре, хоккей яратучылар җыелды. Яшь хоккейчыларны сезон ябылу белән хөрмәтле кунаклар – ӘМР башлыгы Мәҗит Салихов, “Татнефть” ААҖ генераль директоры Наил Маганов, аның урынбасары Рөстәм Мөхәммәдиев котлады.

Мәҗит Салихов үзенең чыгышында республикада, шулай ук Әлмәт районында хоккейның әһәмиятен ассызыклады. Аның әйтүенчә, безнең спортчыларның яңа биеклекләр яулавы, профессиональ күнекмәләрен камилләштерүе “Татнефть” ААҖ ярдәменә нык бәйле.

- Бездә спортның бу төрен үстерү өчен бөтен мөмкинлекләр бар, - диде район башлыгы. – Менә дигән “Юбилейный” спорт сарае, “Нефтяник” боз стадионы эшләп тора. Нефтьчеләребез 46 хоккей тартмасы төзеп җиһазладылар, шуларның яртысы авыл җирендә. Бүген районда хоккей белән, балалардан башлап профессионалларга кадәр, дүрт меңләп кеше шөгыльләнә.

Чыгышын тәмамлап, Мәҗит Салихов спортчыларны һәм тренерларны сезонны уңышлы тәмамлау белән котлады, яхшыдан яхшыларга дипломнар һәм медальләр тапшырды.