Әзербайҗан “Бирлик” диаспорасы активистлары Җәлилдә карт кешеләр һәм инвалидлар интернатында булдылар

Җиңү бәйрәме алдыннан әзербәйҗан “Бирлик” диаспорасы активистлары һәм ӘМР ветераннар советы вәкилләре Җәлил бистәсендәге карт кешеләр һәм инвалидлар интернатында булдылар. Акция өлкән буынны, интернатта яшәүче сугыш һәм тыл ветераннарын куандыру максатында үткәрелде. Андыйлар биредә 16 кеше, 5есе Әлмәт районыннан.

Республиканың нефть башкаласында күп милләт кешеләре яши һәм эшли, “Бирлик” 500ләп әзербәйҗан кешесен берләштерә. Алар җәмәгать тормышында, шәһәр һәм райондагы хәйрия акцияләрендә теләп катнашалар. 2010 елда Түбән Абдулда яшәүчеләр табигый казадан зыян күргәч, алар төзү материаллары алырга булыштылар. 2013 елда, “Мәктәпкә җыенырга ярдәм ит” акциясендә катнашып, аз керемле гаиләләрдәге балалар өчен 150 мең сум акча җыйдылар. Һәр елны кече мәйданны сабан туена әзерләү әзербайҗан диаспорасы көче белән эшләнә.

Әзербайҗан диаспорасы җитәкчесе Фикрәт Бакировның әйтүенчә, Җәлилдәге интернатка баруны, андагыларга ярдәм итүне ул күптән уенда йөрткән. Ватандашлары да аны яклаган. Диаспора активистлары, тиз арада акча җыеп, интернат-йорттагы сугыш һәм тыл ветераннарын котларга ният иткәннәр. Бәйрәм өстәленә җимешләр, тәм-төмнәр, соклар, башка продуктлар алганнар, интернаттагылар өчен дип махсус әзербайҗан пылавы пешергәннәр.

Интернат директоры Минзөлфия Сәлахова әзербайҗан диаспорасы җитәкчеләренә, аларның ватандашларына, ӘМР ветераннар советы вәкилләренә пансионатта яшәүчеләрне кайгыртканнары өчен зур рәхмәт әйтте, бу әле соңгы очрашу булмас дигән өмет белдерде.