Дәһшәтле елларның бүген дә Төзәлми йөрәктә ярасы...

Бәйрәм алды көннәрендә ветераннар яшәгән йортлардан кунаклар өзелми. Сугыш афәтенең шаһитлары булган, кеше түзә алмаслык авырлыкларны кичерергә мәҗбүр булган өлкән буын кешеләренә кадер -хөрмәт күрсәтүне һәркем изге бурычы итеп кабул итә. Бу эштән ТОСМС лар, иҗтимагый оешмалар да читтә калмый.

Шәһәрнең үзәк өлешендә урнашкан 4 нче ТОСМС җитәкчесе Ирек Хәнипов сүзләренә караганда, территориаль совет карамагында эшләп чыккан оешма-предприятиеләре таралган 30 дан артык пенсионер исәпләнә. Алар арасында Вөек Ватан сугышы ветераннары да бар. Шундыйларның берсе бүгенге көндә Колшәрип авылында кызы һәм кияве тәрбиясендә яшәүче Әюпова Нәгыймә Мөхәммәтгалимовна.

6 май көнне 4 нче ТОСМС җитәкчесе Ирек Хәнипов, Ветераннар Советы рәисе Лариса Степанова рәсми рәвештә ветеранны котлап открыткалар һәм азык -төлек салынган пакет тапшырдылар. "Альметьевский вестник" газетасы баш мөхәррире Ландыш Зарипова Нәгыймә апаны мөхәррият, Әлмәт хатын -кызлар берлеге исеменнән тәбрикләп, бүләкләрен бирде.

Илдә ачлык булган 1921 нче елда туган кызның язмышы да җиңелләрдән булмый.10 нчы сыйныфны туган авылы Лениногорск районы Зәй-Каратайда тәмамлаганнан соң колхозда төрле эшләрдә йөри. Сугыш башланганның икенче көнендә диярлек, әлеге авылдан ындыр табагында эшләп йөргән җирләреннән өч кызны чыкыртып алалар да, басуда калган якыннары белән дә хушлашырга да ирек бирмичә, бер капчык кипкән сохари белән Бөгелмә военкоматына озаталар. Нәгыймә Мәрзия исемле иптәш кызы белән Владивостокка, хәрби аэродромны саклый торган частькә җибәрелә. Товар поездында бер ай барганнан соң гына билгеләнгән хезмәт урынына килеп җитәләр. Бары 1943 елда гына киредән туган якларына кайтырга мөмкинлек туа. Гаиләнең бердәнбер туендыручысы булганлыктан, көнне төнгә, төнне киредән көнгә ялгап эшләргә туры килә. Гомеренең күп елларын балалар бакчасында, шәһәргә күчеп киткәч, хастаханәдә санитарка булып эшли.

Нәгыймә апа Әюпова тиздән 93 нче гомер җәен каршылар. Каты авырулар белән көрәшсә дә, аның әле 70 нче Җиңү язын күрәчәгенә ышанычы зур. Берүк шулай булсын! Үзе дә сугыш чоры баласы булган кызы Тәслия 3 оныгы, 9 оныкчыгы өчен дә ул бик кадерле кеше.

Ф.САБАЛЫ
Автор фотосы