“Юл приставы” Әлмәттә бурычлыларны тота

18 һәм 21 апрельдә Әлмәттә “Юл приставы” комплексын кулланып рейд үткәрелде. Әлеге программалы комплекс суд приставлары хезмәте мәнфәгатьләрендә бурычы җыелган автомобильчеләрне эзләү өчен кулланыла.

Нәтиҗәдә 83 бурыч иясе ачыкланды. Шул урында ук 198 мең сум штраф түләнде. 35 мең сумы салым хезмәте, 60 меңе ЮХИДИ файдасына. 4 автомобильгә арест салынды.

Бурычы булган кешенең машинасын танып, комплекс тавыш сигналы бирә, бурыч турында мәгълүмат монитор экранына чыга. ЮХИДИ инспекторы автомобильне туктата. Суд приставлары яки салым инспекторлары шул урында ук кешедән бурычын түләтәләр яисә аңа квитанция яки суд карары тапшыралар, милеккә (автомобильгә) арест салынырга да мөмкин. Шул рәвешле “юлда бурыч каплау” төрлечә бурычлы кешеләргә карата кулланылырга мөмкин: салымнарын түләмәүчеләр дә, алименттан качып йөрүчеләр дә, банк кредитын кайтармаучылар да, коммуналь түләүләрен сузып йөрүчеләр дә, юл штрафы җыелган кешеләр дә – берсе дә “Юл приставы”ннан котыла алмый.