"Рисаләи Газизә" китабы киң җәмәгатьчелеккә тәкъдим ителде

18нче апрель көнне Татарстан мөселманнары Диния нәзарәте Казан үзәгендә урнашкан Милли китапханәдә рухи мирасыбыз ядкаре Таҗеддин Ялчыголның “Рисаләи Газизә” китабын тәкъдир итте. Татар халкының күренекле галимнәрен, дин әһелләрен, язучыларын һәм җәмәгать эшлеклеләрен җыйган презентация дин, мирас, әхлак, рухый байлык төшенчәләрен ихластан күтәргән бер мөһим чара буларак узды.

Чараны Татарстан мөфтие Камил хәзрәт Сәмигуллин Коръән укып башлады. Аннары мөфти барчабызга изге теләкләрен җиткереп һәм Аллаһы Тәгаләдән рәхим-шәфкать, тынычлык- иминлек сорап, шулай УК әби-бабаларыбыз һәм күренекле дин галиме, әдип Таҗеддин Ялчыгол рухларына багышлап дога кылды.

Тәкъдир итү чарасын алып барган, китапны басмага әзерләгән танылган галим Хатыйп Йосыф углы Миңлегулов чарага килүчеләрне Ялчыгол һәм аның китаплары тарихы белән тәфсилләп таныштырды.

Кунаклар арасында зыялылардан, галимнәрдән тыш, Ялчыгол нәселен дәвамитүче, сугыш ветераны, тугыз дистәне тутырган Нәкыя апаның түр башында утыруы да чарага бер ямь бирде. Нәкыя апа Таҗеддин Ялчыгол нәселенең җиденче буын вәкиле. Мәгълүм булганча, “Рисаләи Газизә” китабы Нәкыя апаның улы - Татарстан Республикасы Президенты Аппараты җитәкчесе Сәфәров Әсгать Әхмәт улының матди ярдәме белән чыкты.

Китапны Татарстан мөселманнары Диния нәзарәтенең “Хузур” нәшрият йорты бастырды.