Әлмәттә “Дөнья. Космос. КАИ” дигән интеллектуаль-спорт уены булды

Бәйрәм көнне Татарстан нефтенең 60 еллыгы исемендәге шәһәр паркында, кешенең космоска беренче тапкыр очуына 53 ел тулуга багышлап, “Дөнья. Космос. КАИ” дигән интеллектуаль-спорт уены үткәрелде. Аны райбашкарманың Балалар һәм яшьләр эшләре идарәсе, парк администрациясе ярдәмендә КНИТУ-КАИның Әлмәт филиалы оештырды.

Уенда шәһәр һәм районнан 17 урта мәктәп командасы катнашты. Һәр команда 6 кешедән – 3 малай һәм 3 кыздан тора иде. Командалар тезелгәч, сәламләү сүзе белән район башкарма комитеты җитәкчесенең мәгариф һәм мәдәният буенча урынбасары Резеда Заһретдинова һәм филиал директоры Мәхәббәт Гарифуллина чыгыш ясады.

Уен барышында катнашучыларга Кояш системасының төзелеше, танылган космонавтларның тормышы, Россиянең космос һәм авиация техникасы өлкәсендә белемнәрен күрсәтеп, физик биремнәр дә үтәргә туры килде. Урыннар җыелган балларга карап билгеләнде. Беренче урынга 25нче мәктәп командасы чыкты, 2нче һәм 3нче урыннарда 2нче һәм 18нче мәктәп командалары.

Уен кысаларында шәһәрдәге үсмерләр клубларында тәрбияләнүчеләр арасында рәсем конкурсы да булды, жюри карамагына тематикага туры китереп, сыйфатлы итеп башкарылган 24 эш тәкъдим ителде.