ТРда “Татарстанның чиста урманнары” акциясе старт алды

ТР Урман хуҗалыгы министрлыгы республика территориясендә урманнарда санитар-экологик вазгыятьне яхшырту буенча “Татарстанның чиста урманнары” акциясен уздыра. Чара 14 нче апрельдә старт алды.

Чара барлык дәүләт һәм муниципаль учреждениеләре, ведомстволар, предприятиеләр, уку йортлары вәкилләрен берләштерә.

Чара барышында урманнары чүптән, көнкүреш калдыкларыннан, чыбык-чабыклардан чистарту оештырылачак. Үткән елда акциядә 7,3 меңнән артык кеше катнашкан, якынча 400 предприятие, 543 урман фонды арендаторы, 25 бакчачылык ширкәте һәм кооперативы җәлеп ителгән. Нәтиҗәдә, 4882 куб.м артык каты көнкүреш һәм башка калдыклар җыелган һәм чыгарылган, дип хәбәр итә ТР Урман хуҗалыгы министрлыгы матбугат хезмәте.

“Аеруча сакланыла торган табигать территорияләрендә гражданнарның ял итү урыннарында уңайлыклар булдыруга зур игътибар биреләчәк, - дип билгели министрлык башлыгы Наил Мәһдиев. – Без үткән елда бу эшне башладык инде, быел – дәвам итәрбез. Ял зоналарын урман белән гармониядә, халык өчен уңайлы урыннарда җиһазландырырга тырышабыз”.

«Татар-информ»