Әдипләр җыелган җирдә

7 апрель көнне, ТР Язучылар берлегенең Әлмәт оешмасында аның яңа рәисе Шаһиев Рәфкать Ширияздан улы рәислегендә беренче җыелыш булып узды. Аның эшендә көньяк-көнчыгышның 10 муниципаль районында иҗат итүче язучылар катнашты. Көн тәртибенә берничә мәсьәлә чыгарылган иде. Иң башлап Рәфкать Шаһиев күренекле язучылар һәм шагыйрәләргә үзе турында тулырак мәгълүмат бирде, кайларда эшләве, нәшер ителгән китаплары белән таныштырды.

Белешмә: Рәфкать Шириаздан улы Шаһиев 1968 елның 2 октябрендә Татарстанның Әлмәт районы Кичүчат авылында туа. Туган авылында сигезъеллык мәктәпне тәмамлаганнан соң, Лениногорск педагогия училищесының рәсем сәнгате бүлегендә укый. 1988-1990 елларда армия сафларында хезмәт итә. Казан дәүләт университетының татар филологиясе, тарихы һәм көнчыгыш телләре факультетын тәмамлап, 2001 елда "Татарстанның көньяк-көнчыгыш Кама аръягы микротопонимнарына тарихи-лингвистик анализ" дигән темага кандидатлык диссертациясе яклый.

Армия хезмәтенә кадәр, 1988 елда Яңа Нәдер урта мәктәбендә укытучы, 1990-1992 елларда Яңа Кәшер урта мәктәбендә тәрбия эшләре буенча директор урынбасары, 1992-2002 елларда Кичүчат мәктәбе директоры, 1997 елдан Әлмәт дәүләт муниципаль институтында эшли. 2001 елда институтның татар филологиясе кафедрасы мөдире итеп билгеләнә, 2009 елдан уку-укыту эшләре буенча беренче проректор.

Туган авылы Кичүчатта күренекле мәгърифәтче Ризаэддин Фәхреддиннең мемориаль музеен оештыручыларның берсе. Фәнни мәкаләләре Әлмәт, Түбән Кама, Казан, Мәскәү, Волгоград, Пятигорск, Йошкар-Ола, Төмән, Тобол, Чиләбе, Улан-Удэ, Майкоп, Махачкала шәһәрләрендә басыла. Уннан артык кандидатлык диссертацияләренә, монографик хезмәтләргә бәяләмәләр яза. Әдәбият-сәнгать өлкәсенә караган иҗади һәм публицистик язмалары "Мәдәни җомга", "Шәһри Казан" газеталарында дөнья күрә. Филология фәннәре кандидаты, доцент, "РФ гомум белем бирү мәктәпләренең мактаулы хезмәткәре", Р.Төхфәтуллин исемендәге әдәби бүләк иясе.

Утырыш күңелле вакыйгалар белән дәвам итте. Күптән түгел генә Татарстан Язучылар берлегенә кабул ителгән Зинаида Захарова(Кәләй) һәм Рәхия Әхмәтҗановага (Җәлил бистәсе) тантаналы төстә таныклыклар тапшырылды. Икенче мәсьәлә, Әлмәт язучылар оешмасының эш тәртибе, планы буенча сөйләшү, фикер алышу шактый озакка сузылды. Агымдагы елда Рафаил Төхфәтуллин һәм Энҗе Мөэминованың 90 еллыкларын югары дәрәҗәдә драма театрында уздыру, яшьләр белән эшне активлаштыру өчен иҗади бәйге игълан итү, "Кызыл каурыйлар" берләшмәсенә йөрүчеләр өчен мастер-класслар оештыру һәм башкалар каралды.

Фәрдия Хәсәнова