Г. Тукай музеенда “Әйдә халыкка хезмәткә!” дип исемләнгән очрашу узды

Кичәдә 2014 нче елда Г.Тукай исемендәге ТР Дәүләт бүләгенә кандидатлар катнашты

Узган җомгада Габдулла Тукай әдәби музеенда Г.Тукай исемендәге ТР Дәүләт бүләгенә кандидатлар белән “Әйдә халыкка хезмәткә!” дип аталган очрашу кичәсе узды, дип хәбәр итә музейның матбугат хезмәте.
Кандидатлар белән очрашу кичәсе быел үзенчәлекле булды – Габдулла Тукай әдәби музеенда яңа традициягә нигез салынды: узган ел Г.Тукай бүләге алган шәхесләр дә бу кичәгә чакырылды, алар музейга бүләкләр алып килеп, фондларны тулыландырды.

Тукай премиясенә 2014 елда кандидатлар дип шагыйрәләр Клара Булатова һәм Флера Гыйззәтуллина, җырчылар Фән Вәлиәхмәтов һәм Рафаил Ильясов, рәссам Илгизәр Самакаев, каллиграф Владимир Попов, композитор һәм ТР Дәүләт симфоник оркестры дирижеры Александр Сладковский, язучылар Фатыйх Сибагатуллин, Нурислам Хәсәнов һәм Вахит Имамов билгеләнде.

Тамашачыларга шагыйрә Флера Гыйззәтуллинаны ишетеп, аның шигырьләрен тыңлау, иҗади планнары белән танышу кызык булды.

Шагыйрә Клара Булатова турында аның укучысы, журналист Атлас Гафиятов сөйләде, шагыйрәнең яңа әсәрләре яңгырады. Тамашачылар зур канәгатьләнү белән Фән Вәлиәхмәтов башкаруында татар халкының борынгы җырларын тыңладылар. Кичәгә килгән тагын бер танылган җырчы Рафаил Ильясов үзенең татар җырын пропагандалау өлкәсендәге эшләре, зур-зур залларда узган концерт программалары турында сөйләде. Рәссам Илгизәр Самакаев һәм каллиграф Владимир Поповның иҗаты музейга килүче кайбер тамашачылар өчен ачыш булды. И.Самакаев – татар мәдәниятенең күренекле шәхесләренең портретлары, шул исәптән, Сара Садыйкова портреты авторы. Ә В.Попов – дөньякүләм күренекле каллиграф, бик тә үзенчәлекле, оригиналь шамаил һәм тугралар авторы. Композитор Александр Сладковский турында аның хезмәттәше, музыкант Җанбәк Монасыйпов сөйләде. Язучы Фатыйх Сибагатуллин тамашачыларга үзенең “Атилладан Президенткача” дип аталган тарихи-публицистик китаплар сериясен тәкъдим итте. Укучы инде яратып өлгергән повестьлар авторы Нурислам Хәсәнов хәзерге татар прозасының торышы турындагы фикерләре белән уртаклашты, иҗади планнары турында сөйләде.

Тамашачылар кандидатларга үзләрен кызыксындырган соруларны бирде, әдәби әсәрләр һәм татар халык җырларын тыңлады, рәссамнарның картиналары белән хозурланды.

Чарада Казан шәһәренең тарих, татар теле һәм әдәбияты укытучылары, югары уку йортлары мөгәллимнәре тамашачы сыйфатында катнашты.

“Татар-информ”