Өлкәннәр игътибар үзәгендә

ХХ гасырның тарихка уеп язылган авыр да, кайгылы да көннәрен үз җилкәләрендә күтәргән ветераннарга кадер-хөрмәт күрсәтүгә юнәлдерелгән чаралар дәвам итә. Яшәү рәвеше, хезмәтләре белән берничә буынга үрнәк булган өлкән буын кешеләренең арабызда булуы күңелне сөендерә.

24 март көнне Әлмәт шәһәрендә яшәүче Харисова Гайнелҗинан Нуретдиновна үзенең 95 яшьлек күркәм юбилеен билгеләп узды. Аны тәбрикләргә муниципаль район башлыгының сәламәтлек саклау буенча урынбасары Равил Хәйруллин, Халыкны социаль яклау идарәсе җитәкчесе Закирҗан Шакирҗанов, балалары һәм туганнары килгән иде.

Гайнелҗинан Нуретдиновна 1919 елның 23 мартында Әлмәт районы Колшәрип авылында туган. Авылда 4 кенә сыйныф булу сәбәпле, 7 нчене Әлмәтнең Бигәш авылы мәктәбендә тәмамлый. Үз чоры өчен шактый укымышлы булган кызны авыл Советына секретарь итеп алалар. Тик әлеге эштә озак тоткарланырга туры килми, күптән түгел генә 18 яшь тулган Гайнелҗинан Игенче авылы егетенә тормышка чыгып, шунда күченеп китә. Авырлыклар алдында каушап калмый, эштән курыкмый торган киленне икенче көнне үк диярлек колхоз фермасына сыер саварга чакыралар. Тормышлары җайга салынып, нәни кызлары дөньяга килеп 3 ай узуга, ил өстенә кара кайгы ябырыла. Ире Закуанны авылдан беренчеләрдән булып сугышка алалар. 42 нең көзендә, икенче тапкыр яраланганнан соң аның батырларча һәлак булуы турында өчпочмаклы хат килеп төшә. Кечкенә генә бер йортта ике сукыр карчык, өч айлык кечкенә кызы белән ялгыз калган Гайнелҗинан апаның башыннан кичергән авырлыкларын сөйләп кенә аңлатырлык түгел.

Беренче көннәрдән үк ул тормыш дилбегәсен үз кулына ала. 6 ел буе хатын-кызлар, үсмер балалардан гына диярлек торган бригаданы җитәкли. Фронт өчен икмәк, бәрәңге җитештерү планын арттырып үтәүгә үзеннән лаеклы өлеш кертә.

1947 елда фронтларны урап кайткан Сафуан белән очрашып, яңа гаилә корып җибәрәләр. Аз гына булса да яхшы тормышка өметләнеп, авылдан чыгып киткән Гайнелҗинан апа Әлмәтнең кирпеч заводына эшкә урнашып, кызу мичләрдә төзеләчәк яңа шәһәрнең биналары өчен кирпеч суга. Соңрак 52 нче СМУда иң авыр хезмәтләрнең берсе - изолировщик вазифаларын башкара. Хезмәт белән узган тормышта гаилә шатлыкларына, мәшәкатьләренә дә урын табыла. Ире Сафуан белән алар 6 бала тәрбияләп үстерәләр. Кызганычка каршы, 4се вакытсыз гүр ияләре булалар, бүгенге көндә аларның бары икесе генә Гайнелҗинан апа янәшәсендә 6 оныгы, 4 оныкчыгының шатлыклы тавышлары, авыр кайгыларны оныттыра.

Гайнелҗинан апа Харисованы 95 яшьлек юбилее белән тәбрикләп Равил Газнавиевич район башлыгы Мәҗит Салиховның котлауларын җиткерде, бүләкләр тапшырды. РФ Президентының юбилярларга адресланган котлау открыткасын укыды.

Озак еллар эшләп лаеклы ялга чыккан предприятиесе таралса да, Гайнелҗинан апа җирле властьләр, халыкны социаль яклау идарәсе, Ветераннар Советы тарафыннан күрсәтелгән игътибардан канәгать. "Гел онытып бетермиләр, бәйрәмнәргә дә чакыралар, бүләк, күчтәнәчләр дә бирәләр. Ходай эшләрендә җиңеллекләр бирсен дә, илләребез тыныч булсын, "- ди ул.

Фәрдия ХӘСӘНОВА , “Әлмәт хәбәрләре” газетасы