Шигърият ул - туган халкыбызның мәңге сүнмәс олы иҗаты

Матур эшләр, игелекле гамәлләр дәвамлы була. Ике ел элек Әлмәт дәүләт муниципаль хезмәт институты ректоры Ильяс Салахов инициативасы һәм Гыйльми совет карары белән танылган шагыйрә, актив җәмәгать эшлеклесе, ТР ның атказанган мәдәният хезмәткәре, Р.Төхфәтуллин исемендәге әдәби бүләк иясе, гомерен яшь буынга белем һәм тәрбия бирүгә багышлаган Клара Булатова исемендәге премия булдырылган иде. Яшь буында татар әдәбиятына, сәнгатенә карата мәхәббәт, иҗатка карата кызыксыну уяту, талантларны барлау, аларга башлангыч бирү кебек олы максатларны күздә тота әлеге проект. Бүген, 20 март көнне, институтның Р.Фәхретдин урамындагы бинасында өченче тапкыр укучыларга, студентларга Клара Гариф кызы Булатова исемендәге премия тапшыру тантанасы булды.

Институт студентлары, укытучылары арасында дип кенә башланган бәйге республикакүләм масштабка күтәрелде. Уку йортының фәнни эшләр буенча проректоры, филология фәннәре кандиданты, доцент һәм бәйрәмне алып баручы Рауза Гаррапова билгеләп узганча, "Очрашулар елда кабатланып торсын!" дигән сүзләр "амин" дигән сәгатькә туры килгән булса кирәк. Быел чарада Татарстанның 18 муниципаль районыннан, Казан, Яр Чаллы, Түбән Кама, Алабуга һәм башка шәһәрләрнең 108 мәктәбеннән килгән укучылар, Казан федераль университетының Алабуга институты, Казан дәүләт аграр университеты, Самара дәүләт медицина университеты, Әлмәт дәүләт нефть институты һәм башка уку йортлары студентлары катнашты. 2014 елда әлеге премиягә дәгъва иткән 412 эш кабул ителгән. Әлеге чараның киң җәмәгатьчелектә шундый зур кызыксыну уятуы чиксез шатландыра, әлбәттә.

- Татар теле, әдәбиятыбыз, мәдәниятебез Клара Булатова кебек фидакарь затлар булганда яшәячәк. Без аны бик хөрмәт итәбез, күп еллар дәвамында, нәкъ менә бездә студентларга белем бирүе белән горурланабыз.Ул безнең укытучыбыз, остазыбыз.Татар балалары Клара апа Булатованың иҗатына карап, үрнәк алып үзләренең талантларына юл ачалар,- диде Ильяс Салахов премия тапшыру тантанасын ачып. - Ходай Сезгә озын гомер, сәламәтлек бирсен. Бу премияне тапшыруга башлангыч биргәнбез икән, аның дәвамлы булачагына ышанабыз.

Татарстан Республикасы язучылар берлеге рәисе Рәфис Корбанов шагыйрә исемендәге премия булдырылуны, аның шулай зурлап уздырылуын иҗат, сәнгать бәйрәме дип атады һәм барлык язучылар исеменнән олы рәхмәт сүзләрен җиткерде. «Клара Гарифовна әлмәтлеләрнең генә түгел, бөтен татар халкының күрке, горурлыгы. Быел аның олы бүләккә лаек икәнлеген танырлар, Тукай премиясе лауреатлары арасында хөрмәтле шагыйрәнең дә урыны түрдән булыр, дип ышанабыз. Әлеге бәйрәмне үткәрү Клара Булатованың укытучылыктан киткәннән соң да, яшь талантларны барлау, тәрбияләү эшен дәвам итүе дип кабул итәм», – диде ул үзенең чыгышында.

- Положение буенча бәйгедә поэзия, проза, драматургия һәм җыр сәнгате юнәлешләрендә иҗат итүчеләр катнашты.Клара Булатованың иҗаты буенча язылган фәнни эшләр дә кабул ителде. Комиссия әгъзаларына җибәрелгән эшләрнең һәрберсе аерым игътибарга лаек, яшьләребез күп, телебезнең киләчәге өметле дигән фикерне белдерделәр алар.

Эш дәвамлы булды, дип әйтүебез очраклы хәл түгел. Узган елгы җиңүчеләрнең әсәрләрен бергә туплап, "Яңа җырлар шавы" дигән китап чыгару, аларны яшь авторларга бүләк итү бәйрәмдә ямь өстенә ямь булды.

Укучылар һәм студентлар "Иҗат эше"(251 эш), "Нәфис сүз"(74 гариза), "Әдәбият" һәм "Фәнни эш" номинацияләре буенча бүләкләнделәр. Алар үзләре иҗат иткән шигырьләрен сөйләделәр, язылган чәчмә әсәрләреннән өзекләр укыдылар. Ике сәгатькә сузылган иҗат бәйрәме бәйгедә катнашып, премиягә лаек булган яшьләр өчен генә түгел, барыбыз өчен дә истәлекле вакыйгага әверелде. Бәйгедә бүләкләр дә тапшырылды.

Бәйрәмнең сәбәпчесе, мөхтәрәм шәхесебез Клара апа Булатова бәйгедә катнашып, үзләренең талантлары, тырышлыклары белән җиңүчеләр булып танылган укучыларга һәм студентларга мөрәҗәгать итеп:

- Минем иҗатымның бүгенге югарылыкка күтәрелүендә әлеге уку йортының өлеше искиткеч зур, гомеремнең күп еллары алар белән бәйле. Әгәр яңадан тусам, мин барыбер укытучы һәм шагыйрә булыр идем.

"Шушы яктан, шушы туфрактан без,
Шунда үскән безнең яшьләргә.
Мирас булып җырлар калдырырлык,
Шагыйрь булып килдек яшәргә", - дип кабатлады шагыйрә үзенең җавап сүзендә. Без төбәгебездә иҗаты күп гасырларга мирас булып калырлык шагыйрәбез булуы белән горурланабыз, әдәбиятыбызның үсешенә өлеш кертүчеләрнең хезмәтләре уңышлы булсын, дигән теләктә калабыз.

Фәрдия ХӘСӘНОВА