Нефтьчеләр башкаласында яшәү шартлары уңай

Татарстанда муниципаль берәмлекләрнең социаль-икътисади үсеше даими контрольдә тотыла һәм җирле үзидарә органнары эшчәнлегенең нәтиҗәсе ай белән саен 14 позиция бәяләнә, ирешелгән уңышлар карала. Татарстан Икътисад министрлыгы шуларга карап, муниципаль берәмлекләрнең социаль-икътисади үсеше рейтингын төзи. Боларга уртача хезмәт хакы, гомер озынлыгы, эшсезлек күрсәткечләре, торак төзү темплары, шәһәр-районга җәлеп ителгән инвестицияләр күләме һ.б. керә. Узган атнада Хөкүмәт йортында узган видеобрифингта Татарстан Президент Аппараты җитәкчесе урынбасары Илнур Гарипов рейтинг төзүдәге нечкәлекләр турында сөйләде.

Үткәрелгән анализ алдынгы районнарның ни рәвешле югары нәтиҗәләргә ирешә алуын, артта калучыларның нинди юнәлештә тиешенчә эшләмәгәнлекләрен ачыклау өчен дә зур ярдәм булып тора.

Узган ел нәтиҗәләре буенча әлеге исемлекнең башында Казан шәһәре, Әлмәт һәм Лаеш районнары бара. Хезмәт хакы буенча Әлмәт районы иң алдынгы урында - биредә уртача 31 мең сум алалар. Лаеш районы исә эшсезлек дәрәҗәсенең түбән күрсәткечләре белән җиңә - биредә ул нибары 0,32 процент. Әлеге районнарның югары урыннарда торуына инвестицияләр күләме кебек фактор да үз өлешен керткән. Республика буенча җан исәбенә уртача 43 мең сум инвестицияләр туры килсә, Лаеш районында бу 141 мең сум (3 урын), Әлмәттә - 91 мең сум (5 урын). Торак төзелеше буенча да нефтьчеләр башкаласында күсәткечләр горурланырлык. Шушы һәм башка бертөркем күрсәткечләр җыелмасы буенча Казан, Әлмәт һәм Лаеш районнары беренчелекне яулый алган.

Илнур Гарипов узган ел нәтиҗәләре буенча үсешкә ирешкән районнарны аерым билгеләп китте. Менделеевск һәм Теләче районнары рейтингта 8 позициягә күтәрелә алган. Азнакай, Әтнә районнары да мактау сүзләренә лаек - бу районнар үз позициясен 7 баскычка яхшырта алган.

Аерым рейтинглар гомуми белем бирү сыйфаты, сәламәтлек саклау өлкәсендәге күрсәткечләр, агро-сәнәгать үсеше буенча да төзелгән. Рейтингның иң аскы баскычларында исә Чистай, Спас, Тәтеш районнары урнашкан.

Министрлар Кабинеты җитәкчесе Шамил Гаффаров ассызыклаганча, Татарстан Россиянең башка субъектларына үрнәк булып санала һәм мондый нәтиҗәгә ирешү өчен үз мөмкинлекләреннән тулы күләмдә файдаланырга да тиеш. "Соңгы елларда республикабыз шактый гына зур уңышларга иреште. Әмма үсү өчен җирлек бик зур әле. Әйтик, Россия субъектлары арасында кече һәм урта бизнес үсеше буенча республикабыз 23 урында тора, инвестицияләр күләме буенча - 18 баскычта. Җан исәбенә туры килгән салым һәм башка төр керемнәр күләме буенча - 4, хакимият органнары эшчәнлегеннән канәгатьлек күрсәткече буенча исә 5 урында тора,"- ди ул.

Гомумән алганда, республика һәм ведомстволар эшчәнлеге уңай бәяләнде. Быелның январь-февраль айларында узган йомгаклау коллегияләрендә төп нәтиҗәләр ясалып, 2014 елга планнар билгеләнгән. Республика җитәкчелеге икътисадка юнәлтелгән бюджет акчасының нәтиҗәле тотылуын тәэмин итүне, кече һәм урта эшмәкәрлек өчен бизнес вәкилләренә уңайлы шартлар тудыруны, Татарстанны инвесторлар өчен кызыклырак итү, мәгълүматлаштыру өлкәсендә югары нәтиҗәләргә ирешүне күздә тота.

ФӘРДИЯ МИННЕБАЕВА