Әлмәттә Бөек Җиңүнең 70 еллыгына багышланган чараларны әзерләү һәм үткәрү буенча оештыру комитеты утырышы булды

12 мартта ӘМР башкарма комитетының зур залында Бөек Ватан сугышында җиңүнең 70 еллыгына багышланган чараларны әзерләү һәм үткәрү буенча оештыру комитетының чираттагы утырышы булды. Утырышта ТР Дәүләт Советы депутаты, ТР профсоюзлар федерциясе рәисе Татьяна Водопьянова катнашты.

Район башлыгы Мәҗит Салихов, залда утыручыларны сәламләп, утырышның төп мәсьәләсе, ТР президенты аппараты тәкъдим иткәнчә, Бөек Ватан сугышы ветераннарын тартып, балаларга һәм яшьләргә патриотик тәрбия бирү булуын әйтте.

ӘМР башкарма комитетының балаларга һәм яшьләргә патриотик тәрбия бирүдә бурычлары турында район хәрби комиссариатының хәрби хезмәткә әзерләү һәм чакыру бүлеге башлыгы Евгений Гурков, мәгариф идарәсе башлыгы урынбасары Гүзәл Әмирова, балалар һәм яшьләр эшләре идарәсе башлыгы Родион Карпов, район ветераннар советының балаларга һәм яшьләргә патриотик тәрбия бирү комиссиясе рәисе Габделвахит Гыйззәтуллин чыгыш ясадылар.

Социаль яклау идарәсе башлыгы Закирҗан Шакирҗанов бәйрәмгә әзерлек эшләренең барышы белән таныштырды, ветеранның социаль паспортын булдыру эше башлануын хәбәр итте.

“Татнефть” ААҖ предприятиеләрендә эшләп чыккан ветераннар сәламәтләндерү учреждениеләренә путевка алып торалар. 2013 елда гына ветераннарны сәламәтләндерүгә 10 миллион сумнан күбрәк акча тотылган. Мәҗит Салихов компаниягә һәм аның генераль директоры Наил Магановка зур рәхмәт белдерде.

Татьяна Водопьянова үзенең чыгышында, патриотик тәрбиянең бервакытта да тукталмаска тиешлеген әйтеп, Әлмәт муниципаль районында бу эшнең югары дәрәҗәдә куелуына күңеле булуын белдерде, бу эшне тагын да активрак алып барырга чакырды.