Бакча балаларына янгын афәте турында мультфильм күрсәтәләр

Янгын куркынычсызлыгы нигезләрен кече яшьтән үк балаларның канына сеңдерергә кирәк. Моның өчен Бөтенроссия янгыннан саклану ирекле җәмгыятенең Әлмәт бүлеге төрле чаралар оештыра: мәктәпкәчә яшьтәге балалар белән очрашулар үткәрелә, балалар бакчаларында янгын куркынычсызлыгы темасына мультфильмнар күрсәтү оештырыла, мәктәпләрдә викториналар, конкурслар белән класс сәгатьләре була.

Менә 5-нче балалар бакчасында да балаларга уен формасында янгын куркынычсызлыгы кагыйдәләре турында сөйләделәр, янгын чыга калганда ничек эш итәргә кирәклеген аңлаттылар. Аннары “Спасик и его друзья” дигән мультфильм күрсәтелде, бәләкәчләргә ул бик ошады. Очрашу истәлеге итеп һәм материалны хәтердә калдыру максатында балаларга ут куркынычсызлыгы кагыйдәләре турында бизәкле плакатлар бүләк ителде.