Фәрит Мөхәммәтшин ӘМР Советы һәм шәһәр Советының XXXI сессиясендә катнашты

Бүген район башлыгы Мәҗит Салихов рәислегендә ӘМР Советы һәм шәһәр Советының XXXI сессиясе булды. Анда Мәҗит Салихов 2013 елгы эшчәнлек турында хисап һәм 2014 елга бурычлар турында доклад ясады.

Сессия эшендә ТР Дәүләт Советы рәисе Фәрит Мөхәмәтшин, Куркынычсызлык советы секретаре Валерий Власов, ТР президентының нефть сәнәгате мәсьәләләре буенча киңәшчесе Шәфәгать Тәхәветдинов, “Татнефть” ААҖ генераль директоры, район Советы депутаты Наил Маганов катнашты.

2013 елга йомгак ясаганда Мәҗит Салихов елның истәлекле вакыйгаларга бай булуын әйтеп үтте. Юбилей чараларына әзерлек бюджеты 2,5 миллиард сум чамасы тәшкил иткән. Нефтьчеләр башкаласы үзгәрде һәм яңарды. ӘМР башлыгы моның республика җитәкчелеге, “Татнефть” ААҖ, башка предприятиеләр, шулай ук район кешеләре тырышлыгы белән мөмкин булуын ассызыклады.

2013 ел йомгаклары буенча республика муниципаль төзелмәләренең социаль-икътисади рейтингында ӘМР 2-нче урында тора. “Торак йортларны гамәлгә кертү” күрсәткече буенча ул Казан белән Яр Чаллыдан гына калыша.

Үзенең чыгышында Мәҗит Салихов икътисад һәм социаль сфераның барлык өлкәләрендәге уңышлар һәм проблемалар турында сөйләде.

Район башлыгының 2013 елдагы эшчәнлеген бәяләп, Фәрит Мөхәммәтшин районның елны тулаем уңышлы төгәлләвен, республика күрсәткечләренә сәнагать буенча да, социаль мәсьәләләрдә дә саллы өлеш кертүен билгеләп үтте.

Районның уңышлары турында сөйләү белән бергә Фәрит Мөхәммәтшин кешеләр дәүләт органнарына мөрәҗәгать итә торган проблемалы мәсьәләләргә, төп урын алып торганы - торак-коммуналь хуҗалык проблемаларына да тукталды, сәламәтлек саклау, авыл хуҗалыгы, кече һәм урта бизнесны үстерү мәсьәләләренә дә тукталды.

Фикер алышулар тәмамлангач, Фәрит Мөхәммәтшин һәм Мәҗит Салихов дәүләт бүләкләре, муниципаль бүләкләр тапшырдылар.