Әлмәт шәһәренең үзәк мәчетендә Ризаэддин Фәхреддинга багышланган чара үтте

Бүген Әлмәт шәһәренең үзәк мәчетендә бөек якташыбыз Ризаэддин Фәхреддинга багышланган чара үтте. Әлеге чарада кунаклар, районыбыз мәчетләре имамнары һәм Әлмәт ислам мәдрәсәсе шәкертләре катнашты.

Әлмәт районы имам-мөхтәсибе Фәһим хәзрәт Әхмәтҗанов кунакларга рәхмәтләрен җиткерде һәм Ризаэддин Фәхреддин мирасына тукталды.

Әлмәт дәүләт муниципаль хезмәте институты ректоры һәм Бөтендөнья татар конгрессының Әлмәт бүлеге рәисе Ильяс Салахов үзенең чыгышында Ризаэддин Фәхреддин эшчәнлеген яктыртты, үзе җитәкләгән иҗтимагый оешманың планнары белән уртаклашты. 27нче февральдә Яшьләр үзәге бинасында үтәчәк “Ризаэддин Фәхреддин һәм татар мәгърифәтчеләре” исемле Бөтенрәсәй фәнни-гамәли конференцигә чакырды.

Әлмәт мәгариф идарәсенең милли мәсьәләләр буенча белгеч Наҗия Ганиева әхлак тәрбиясе буенча идарәнең эшчәнлегең сөйләде. “Авылым тарихы” дип исемләнгән рубрика астында сыйныф сәгатьләре, дин әһелләре, авылның танылган шәхесләре, сәнгать вәкилләре белән очрашулар үткәрелүен хәбәр итте. Үзәк мәчет, “Әлмәт таңнары” гәҗите һәм мәгариф идарәсе игълан иткән “Авылым мәчете” рәсем конкурсына да озакламый нәтиҗә чыгарылачак. Наҗия Хаҗиевна сүзләренчә, 1нче татар гимназиясендә, Абдрахман, Нәдер, Кичучат, Елховой мәктәпләрендә һәм Нәдер, Колшәрип, Елховой , № 1, № 58, № 62нче балалар бакчаларында хәләл ризык кертелгән.

Р.Фәхреддин исемендәге мемориаль музей директоры Диләрә Гыймранова музей тарафыннан чыгарылган Р.Фәхреддин гыйбәрәләреннән торган китабны тәкъдир итте һәм бөек галим эшчәнлеге белән таныштырды.

Чара мул табыннар артында дәвам итте.


Энҗе Хасаншина

Әлмәт муниципаль районы Башлыгы матбугат үзәге

Ильшат Котбиев фотолары