2014 елда Әлмәт 22 федераль һәм республика программасында катнашачак

2014 елда Әлмәт муниципаль районы 22 федераль һәм республика программасында катнашачак. Бу хакта кичә район башкарма комитеты җитәкчесе Марат Гыйрфанов Дәүләт Думасы, Дәүләт Советы һәм җирле үзидарә депутатларының традицион очрашуы барышында сөйләгән докладында белдерде.

Ул узган елның ӘМР өчен уңышлы булуын белдерде. Муниципаль төзелмәләрнең социаль-икътисади үсеш рейтингы буенча район Казаннан кала республикада 2-нче урында тора.
2014 елда район 22 федераль һәм республика программаларында катнашачак. Моннан тыш, программаларда каралмаган эшләрне башкару өчен финанслар җәлеп итүдә бөтен мөмкинлекләр файдаланыла. Бу – территорияләрне төзекләндерү, инженерлык челтәрләре, килү юллары төзү, мәктәпләргә капиталь ремонт ясауда кайбер исәпкә кермәгән эшләр. Монда “Татнефть” ААҖнә аерым роль туры килә. Андый эшләрне башкаруда депутатлар корпусы, сәнәгать предприятиеләре тарафыннан да спонсорлык ярдәме күрсәтелә.

Марат Гыйрфанов район өчен үтә мөһим булып та программаларга керми калган мәсьәләләрне телгә алды: шәһәр чистарту корылмаларын реконструкцияләү, балалар бакчаларын һәм авыл мәдәният йортларын ремонтлау, район үзәк дәваханәсен реконструкцияләү һәм ремонтлау, авария хәлендәге котельныйларны реконструкцияләү һәм казаннарны алыштыру, троллейбус паркын яңарту һәм яңа микрорайоннарда троллейбус хәрәкәтен үстерү, шәһәр магистральләрен (Шевченко һәм Совет урамнары) реконструкцияләү, Ленин, Әминов урамнары дәвамын төзү.