“Көрәш-2014” республика турнирында әлмәтлеләргә тиңнәр булмады

Герой-шагыйрь Муса Җәлил призларына “Көрәш-2014” республика турнирында Әлмәт командасы бу юлы да үзен абсолют лидер итеп танытты.

80 кг авырлыктагы категориядә Марсель Гозәеров пьедесталның иң югары басмасына күтәрелде. Тагын бер алтын медальне Айвар Билалов алды, 90 килограммлы категориядә ул барлык көндәшләрен дә егып салды. Яшь спортсмен ярышларга Татарстанның атказанган тренеры әтисе Ильяс Билалов белән әзерләнә.

130 кг авырлыктагы категориядә Ильяс Галимов беренче булды. Әлмәтнең абсолют батыры төрле ярышларда, турнирларда бик күп тапкыр чемпион исеме алган Ильяс инде берничә ел җиңелүне белми.

Безнең көрәшчеләр Рамил Синякаев,Рөстәм Мухамов белән Илнур Хурамшин, үз авырлык категорияләрендә призлы урыннар алып, гомуми җиңүгә саллы өлеш керттеләр.

Шундый дәрәҗәле ярышның Кубогы быел да, инде дүртенче тапкыр рәттән, Әлмәт командасында кулында.

“Бу турнирны икенче ел инде Әлмәттә үткәрәбез һәм җиңеп чыгабыз. Быел ветераннар белән бергә ярышларда 430 көрәшче катнашты. Иң көчле батырлар арасында җиңеп чыгып, командалар арасында беренче булу белән без горурланабыз”, – ярышлар тәмамлану белән Әлмәт районы башлыгы Мәҗит Салихов шулай диде.