ТР Дәүләт автоинспекциясе Татарстанның автомәктәпләре антирейтингын бастырган

Исемлектәге мәктәпләр курсантлары транспорт йөртү стажы 3 елдан ким булуы авыр нәтиҗәләргә китергән юл һәлакәтләре сәбәпчесе булган

ТР буенча ЭЭМның ЮХИДИ идарәсе рәсми сайтында Татарстанның автомәктәпләре антирейтингы бастырылган, әлеге мәктәпләрне тәмамлаган кешеләр йөртүче таныклыгын алганнан соң, өч ел дәвамында авыр нәтиҗәләргә китергән юл һәлакәтләрендә гаепле булган.

Таблицада мәгариф учреждениеләре һәм 2013 нче елда автомобиль йөртүгә хокук таныклыгы алучылар гаебе белән юлда килеп чыккан транспорт һәлакәтләреның саны да күрсәтелгән. Автомәктәпләр исемлегендә Казан лидер булган, монда шундый 39 автомәктәп исәпләнә, Яр Чаллыда – 28, Әлмәттә – 12.

Әлеге рейтингта курсантларны тиешле дәрәҗәдә әзерләми торган мәктәпләр исемлеге башында Яр Чаллы учреждениеләре тора: “Марфед” укыту үзәге дәүләтнеке булмаган мәгариф учреждениесе, “Престиж” дәүләтнеке булмаган мәгариф учреждениесе, 76 нче номерлы һөнәр лицее, Бөтенроссия автомобиль йөртүчеләр җәмгыятенең Яр Чаллы бүлеге. Антирейтингның ахырында – Казанның 137 нче номерлы һөнәр училищесы.

Шулай ук курсантлары йөртүче таныклыгы алганнан соң өч ел дәвамында транспорт чарасы белән идарә итү хокукыннан мәхрүм ителгән автомәктәпләр исемлеген бастыру планлаштырыла, дип хәбәр итә ТР буенча ЭЭМ ЮХИДИ идарәсенең пропаганда бүлеге.

Билгеләп үтик: 2014 нче елның гыйнварында өч елдан кимрәк стажга ия йөртүчеләр ТР территориясендә авыр нәтиҗәләргә китергән 40 юл-транспорт һәлакәтенең сәбәпчесе булган, 2 кеше үлгән һәм 58 кеше җәрәхәтләнгән.

Шундый хәлләрнең берсе 27 нче гыйнварда Казанда булган. Җиңел машина йөртүчесе - 1992 нче елгы егет, юлда күчеш ясаганда, юл бирмәгән һәм ике автомобильгә бәрелгән, берсе “КАМАЗ” булган. Яшь йөртүче җәрәхәтләреннән урында ук һәлак булган. Аның пассажиры (1992 нче елгы) төрле җәрәхәтләр белән хастаханәгә китерелгән. Һәлак булган егет 2013 нче елның октябрендә йөртүче таныклыгын алган, “ЯгуарР автомәктәбе” мәгариф учрежедниесендә әзерлек узган.