Диспансерлаштыру һәм капремонт – көн тәртибендә

Сәламәтлек саклау идарәсенең киңәйтелгән планеркасы аның җитәкчесе Равил Хәйруллин рәислегендә үтте. Аның көн тәртибендә киң колачлы ике тема иде: 2013 елда халыкны диспансерлаштыру һәм сәламәтлек саклау биналарына капиталь ремонт ясау йомгаклары.

Беренче мәсьәлә буенча идарә җитәкчесенең урынбасары Вера Головина доклад ясады. Бөтен эш РФ һәм ТРның расланган норматив-хокукый актларына туры китереп эшләнгән. Әлмәт районында барлыгы 33 мең кеше тору урыннарында түләүсез медицина тикшерүе үтәргә тиеш булып, фактта 24 961 кеше тикшерү үткән. Аларның күбрәге хатын-кызлар. 599 кешедә артериаль гипертензия, 141 кешедә йөрәкнең ишемия авырулары, 66 очракта онкологик авырулар беренче тапкыр ачыкланган.

ТР, ӘМР, “Татнефть” ААҖ, “СМП-Нефтегаз” ЯАҖ акчалары исәбенә материаль-техник базаны ныгытуга һәм дәвалау-профилактика учреждениеләре биналарын ремонтлауга 40 млн сумлап акча тотылган.

Шәһәр һәм район сәламәтлек саклау системасына кертемнәрнең гомуми суммасы 213 млн сумнан артыграк булган. Алар 7 ФАПны, Кузайкино участок дәваханәсен, Ямаш врачлык амбулаториясен капиталь ремонтлауга, Келәмәнтәй авыл җирлегенең Багряж авылында блок-модульле ФАП, Әлмәттә кан күчерү станциясе төзүгә һ.б. тотылган.