Алексей Грушин бүген гомумшәһәр планеркасында Әлмәт муниципаль районында авыл җирлекләренең 2013 елдагы эшенә йомгак ясады

Бүген иртәнге гомумшәһәр планеркасында район башкарма комитеты җитәкчесенең авыл җирлекләре белән эшләү буенча урынбасары Алексей Грушин Әлмәт муниципаль районында авыл җирлекләренең 2013 елдагы эшчәнлеге һәм 2014 елга бурычлар турында доклад ясады.

2013 елда Әлмәт районында барлыгы 201576 кеше, шул исәптән 36 авыл җирлегендә һәм Түбән Мактама бистәсендә (Тихоновка авылы белән бергә) барлыгы 51338 кеше яшәгән. Ел дәвамында авылларда 568 кеше туган, 632 кеше үлгән. Табигый кимү 64 кеше тәшкил иткән.

Районның 9 фермеры “Эш башлаучы фермер” программасы буенча грант алу конкурсында катнашты. Зөлфия Юлаева һәм Ришат Харисов җиңүчеләр дип танылды. Грант суммасы – 1,5 млн сум.

2013 елда 3 гаилә фермасы сафка басты, ә бурыч 12 иде. Районда барлыгы 22 гаилә фермасы булып, шуларның 8-е сөт җитештерә, 5-се мөгезле эре терлек симертә, 2-се дуңгыз фермасы, 1-се кәҗә фермасы, алтысы башка төрле.

“Авыл хуҗалыгы бизнесын үстерү” номинациясендә авыл җирлекләре арасында Яңа Нәдер авыл җирлеге җиңүче булды, авыл башлыгы С.Миннебаев. Борискино, Аппаково, Келәмәнтәй, Тайсуган, Ямаш авыл җирлекләре төрле номинацияләрдә республикада иң яхшылар дип табылды һәм автомобиль белән бүләкләнде. Борискино, Миннебай авыл җирлекләре 1 млн сум грантлар алды. Бу акчалар авыл җирлекләрен һәм социаль объектларны төзекләндерүгә тотылачак.

Шулай ук авылларда күп квартирлы торак йортларны җылытуда индивидуаль системага күчү, дүрт торак пунктка газ кертү, электр линияләрен реконструкцияләү эшләре алып барылды.