ТР Президенты авария хәлендәге торактан күчерү программасында катнашучылар белән актив эш алып барырга кушты

Кичә Татарстан Президенты Рөстәм Миңнеханов ТР Министрлар Кабинетындагы традицион киңәшмә барышында, җаваплы министрлык һәм ведомстволарга, авария хәлендәге торактан күчерү программасында катнашучыларга актив аңлату эшләре алып барырга кушты.
Төзелеш программаларының гамәлгә ашырылуы турындагы доклад белән ТР төзелеш, архитектура һәм ТКХ министры Ирек Фәйзуллин чыгыш ясады. Ул хәбәр иткәнчә, ел башыннан Татарстанның барлык муниципаль берәмлекләрендә торак төзелеше программасын тормышка ашыру эше башланган. Татарстанстат мәгълүматларына караганда, республика буенча гыйнвар аенда 220,2 мең кв.м торак гамәлгә кертелгән (еллык биремнең 9,2 проценты). “Быелгы бурыч былтыргыдан гадирәк түгел. Челтәрләргә вакытында тоташтыру буенча ресурслар белән тәэмин итү оешмалары белән эшләүне сорыйм”, - дип белдерде министр.
Социаль ипотека программасы буенча ел башыннан гомуми мәйданы 17,8 мең кв. м булган 12 йорт куллануга тапшырылган, 116 объектта эш дәвам иттерелә.
Шулай ук 2013-2014 нче елларда авария хәлендәге торак программасын гамәлгә ашыру дәвам иттерелә. Ирек Фәйзуллин билгеләп узганча, бүген финанс чараларын дөрес сарыф итү бурычы тора. Күп кенә районнарда программага кертелгән йортлардан күчереп урнаштыру процессы башланган.
Быел Дәүләт торак фонды аша Бөек Ватан сугышының 11 ветераны өчен 3 торак йорт файдалануга бирелгән.
Күп квартирлы инвестиция торагына килгәндә, 2014 нче елда гомуми мәйданы 1,17 млн. кв.м тәшкил иткән 10534 квартирга исәпләнгән 114 йорт төзелеше планлаштырыла.
Шәхси торак төзелешен кертеп, аз катлы торак төзелеше программасы буенча республика күләмендә 8061 объект төзелеше ниятләнә.
Рөстәм Миңнеханов, министр докладын шәрехләп, балалар бакчалары төзелеше һәм аларда капиталь төзекләндерү үткәрү программасының колачлылыгын билгеләп үтте. Ул шулай ук арендалы торак мәсьәләсенә дә кагылды.