Торак-коммуналь хезмәтләр өчен Интернет аша түләү - заман таләбе

Торак-коммуналь хезмәт һәм аның өчен түләүләр бүгенге тормышның иң авырткан ноктасы, дисәк тә, ялгышмабыз. Бөтенроссия җәмәгатьчелек фикерен өйрәнү үзәге үткәргән сораштыру нәтиҗәләренә ышанганда, халыкның 72 проценты әнә шундый фикердә. Аеруча кышкы айларда квартплатаның 3-4, хәтта 6-7 мең сум килүен исәпләсәк, гаиләдәге ике эшләүченең берсе шуның өчен генә хезмәт итәргә тиеш. Халыкның 8 процентын инде иртәгә үк урамга куып чыгарырга мөмкиннәр - алар торак өчен түли алмый. Республикада кулланылган ресурслар өчен бурыч күләме 766,2 млн сум. Әлмәт буенча исә, әлеге күрсәткеч 2014 елның 14 январенә 290 590,5 мең сум тәшкил итә.

Вәзгыятьне аз гына булса да яхшыртыр өчен, халыкның 85 проценты акчасын кысыбрак тотарга тырыша икән: энергияне азрак "ашый" торган лампалар куллана, санагычлар урнаштыра, торакларын җылыта. Акчаны янга калдырыр өчен халыкның 14 проценты антенна, радио, лифттан баш тарткан.

Торак-коммуналь хезмәтләр өчен бурычларның күплеге, бәяләрнең зур булуы белән беррәттән, түләнгән средстволарның үз вакытында тиешле службаларга барып җитәмәвенә дә бәйле. Берәүләрнең акчасы булмаса, икенчеләренең озын-озак чиратларда торырга вакыты кысан. Әлеге очракта да тормышыбызның аерылгысыз өлешенә әверелгән Интернет ярдәмгә килә. Статистик мәгълүматлар буенча, "Ачык Татарстан" рәсми порталы аша электрон түләүләр кабул итү буенча Әлмәт муниципаль районы Түбән Кама һәм Яшел Үзән шәһәрләреннән кала өченче урында. Әлмәттә 79 меңгә якын йорт хуҗалыгы исәпләнә, шуның бары тик 25 проценты гына түләүләрне электрон рәвештә башкара.

Бүген фатир, электр энергиясе, телефон, Интернет, кабельле телевидение өчен электрон формада түләргә була. Интернет аша түләүне башкару өчен кулыгызда берәр банкның пластик картасы булырга тиеш. Коммуналь түләүләрне www.uslugi.tatar.ru ТР дәүләт хезмәтләре сайтында башкарырга мөмкин. Шулай ук Әлмәт рәсми сайты http://almetyevsk.tatar.ru аша да керергә мөмкин. Әлеге сайтның уң ягында, өске якта Госуслуги ( соңгы графа) "Опата за ЖКУ " дигән ячейканы табасыз. Аннары квитанциядә күрсәтелгән ун билгедән торган лицевой номерны һәм түли торган сумманы җыярга кирәк. Шуннан соң түләүчегә үзе турындагы мәгълүматны тутырырга, кайсы банк картасы белән түләүне башкаруын күрсәтәргә кирәк булачак. Әлеге операцияләрдән соң түләүне раслау сорала. Аннан соң банк картагызның мәгълүматларын кертергә һәм түләүне башкарырга кирәк. Шуннан соң экранга түләү турындагы язу чыгуын көтәсе кала. Квитанцияне электрон рәвештә саклау, ә принтер булганда бастырып чыгару мөһим, чөнки ул сезнең түләү турындагы документыгыз. Коммуналь хезмәтләр өчен әлеге ысул белән түләнгән акча якынча өч-дүрт көндә барып җитәчәк.

Өйдән чыкмыйча гына online режимда торак-коммуналь хезмәтләр өчен исәпләүләр турындагы мәгълүматны тикшерергә, лицевой счет белән идарә итәргә, счет-фактурага үзгәреш-ләр кертергә, һәм, мәсәлән, фатирда берничә көн кайнар су булмаган очракта, исәпләүләрне яңадан башкарырга, түләүләр тарихын электрон рәвештә сакларга була. Моның өчен Порталда «Шәхси кабинет» булдырырга кирәк. Теркәлү бик җиңел - моның өчен мобиль телефон номерын күрсәтергә кирәк, аңа соңрак пароль җибәреләчәк.

Сезнең идарәче компаниягезнең әлеге сервиска кушылганлыгын https://uslugi.tatar.ru/personal-account сылтамасы буенча карарга мөмкин.

Фәрдия ХӘСӘНОВА