“Алтыннан кыйммәтле, оҗмах нигъмәтләреннән дә кадерле булган нәрсә – тәрбияле баладыр”.

Р.Фәхреддиннең бу сүзләре бүгенге көндә дә бик актуаль. Бу фикерне даими рәвештә кабатлап торсак та артык булмастыр. Шул нисбәттән Р.Фәхреддин мемориаль музее хезмәткәрләре балаларны гаиләдә тәрбияләү мәсьәләләрен алдынгы планга куеп шәһәр мәктәпләрендә ата-аналар белән очрашулар циклын ачып җибәрделәр. Быелгысы елда аның беренчесе Р.Фәхреддин исемендәге гимназиядә булып узды. Балалары башлангыч сыйныфта укучы ата-аналар очрашуда бик теләп катнаштылар. Р.Фәхреддиннең ”Гаилә – кечкенә бер дәүләттер” дигән сүләре астында узган чарада килгән кунаклар галимнең гаилә фотоальбомындагы гасырлар дәвамында сакланган фотолары, тәрбия темасына язылган “Тәрбияле бала”, “Гаилә”, “Тәрбияле ана” хезмәтләрендәге нәсыйхәтләр белән таныштылар. Көнкүрештә балалар белән килеп чыккан авыр хәлләрдән чыгу юлларын өйрәнделәр. Р.Фәхреддин гаилә мәсьәләләре буенча олы белгеч буларак, ата-аналарга, балаларга аерым вазыйфалар билгеләгән. Һәркем үз вазыйфасын җиренә җиткереп үтәгән очракта гаиләне “үрнәк гаилә”, баланы “тәрбияле бала ” дип атарга мөмкинлекләр киңәя. Музей хезмәткәрләре бу юнәлештә эшләргә, ата-аналар белән очрашулар уздырырга, балаларга музей дәресләре оештырырга чакыра. Олуг галим билгеләп үткәнчә “Дөньяда алтын булырлык кешеләрнең күбесе кирәк булган тәрбия күрә алмыйча туфрак булып җирдә калалар”. Тәрбия мәсьәләсендә җәмгыятьтә без барыбыз бергә бербөтен булып тырышлык куйсак кына камиллеккә ирешербез. Тәрбия мәсьәләләрен өч баскычка бүлеп караган галимебез: гаилә тәрбиясе, мәктәп тәрбиясе, җәмгыять тәрбиясе. Димәк, без һәрберебез үз гаиләбез өчен генә түгел, ә җәмгыятебезнең киләчәге өчен җаваплы. “Балаларыгызны бу замана өчен генә түгел, ә киләчәк заманнар өчен дә җәмгыяткә файдалы шәхесләр итеп тәрбияләргә тырышыгыз”, - дип васыять иткән бит күренекле фикер иясе.