2014 елда Әлмәттә 20 торак йортка капиталь ремонт ясау планлаштырыла

Әлмәт муниципаль районы Советы һәм Әлмәт шәһәре Советының XXX (уртак) сессиясендә депутатлар Әлмәт муниципаль районы һәм Әлмәт шәһәренең 2014 елга һәм 2015-2016 еллардагы планлы чорга социаль-икътисади үсешенең төп күрсәткечләре фаразларын раслады, Әлмәт муниципаль районы һәм Әлмәт шәһәренең 2014 елга һәм 2015-2016 еллардагы планлы чорга бюджетын кабул итте.

Әлеге чорда халык санының артуы сакланачак. 2016 елга ул 205 меңне тәшкил итәр дип фаразлана, шул исәптән шәһәрдә – 150 мең кеше. Эре һәм урта предприятиеләрдә уртача хезмәт хакы 2014 елга 14 % ка артып, аның күләме муниципаль район буенча 34702 сумга җитәчәк, шәһәр буенча – 36744 сум. Болар хакында үз чыгышында район башкарма комитеты җитәкчесенең икътисад буенча урынбасары Айдар Каюмов җиткерде.

Фаразларга караганда, тулай төбәк продукты, читкә озатылган продукция күләме, авыл хуҗалыгы продукциясе җитештерү, район икътисадына җәлеп ителгән инвестицияләр, ваклап сату әйләнеше үсеше көтелә. Социаль-мәдәни объектларны сафка кертү һәм аларга ремонт ясау, биләмәләрне төзекләндерү өстенлекле юнәлешләр булып калачак. “Россия гражданнарына – һәркем ала алырлык һәм уңайлы торак” милли проектын тормышка ашыру дәвам итәчәк. 2014-2016 елларда 155 әр мең квадрат метр торак сафка бастырылыр дип фаразлана. Шуларны искә алып, бер кешенең торак белән тәэмин ителеше 2014 елда 25,3 квадрат метр, 2015 елда - 26,1, 2016 елда 26,8 квадрат метр тәшкил итәчәк. “Яшьлек”, “Көнбатыш капка”, “Алсу”, “Урсалы”, “Дуслык” микрорайоннарында төзелеш эшләре алга таба да гөрләячәк. Киләсе елга 20 торак йортка капиталь ремонт ясау планлаштырыла, алдагы өч елда авария хәлендәге 25 йортта яшәүчеләр яңа фатирларда өй туйлары уздырыр дип көтелә.

Әлмәт муниципаль районының финанс-бюджет палатасы рәисе Зөлфия Шәйдуллина үз чыгышында 2014 елга Әлмәт муниципаль районы бюджеты күләмен керемнәр буенча, республика бюджетыннан булган субсидия һәм субвенцияләрне, бюджетара трансфертларны исәпкә алып, 3 миллиард 16 миллион сумлык дип билгеләде. 2014 елга бюджет чыгымы 3 миллиард 16 миллион сум тәшкил итәчәк.

Гадәттәгечә, бюджеттан мәгариф өлкәсенә зур суммада акча бүленәчәк – 2 миллиард сумнан артык (80 %). Мәдәният өлкәсенә 134 миллион сум, сәламәтлек саклауга 2,4 миллион сум, социаль сәясәткә 89 миллион сум, физкультура һәм спортка 6 миллион сум акча сарыф ителәчәк.

Әлмәт шәһәре бюджеты күләме 2014 елда шәхси керемнәр буенча 875,7 миллион сум булыр дип фаразлана. Бюджет чыгымы 875,7 миллион сум булачак.

Депутатлар шулай ук 2015-2016 еллардагы планлы чорга бюджет күләмен раслады. 2015 елда ул 3 миллиард 22 миллион сум, 2016 елда 3 миллиард 128 миллион сум булыр дип фаразлана.

Сессия фидакарьләргә дәүләт бүләкләре тапшыру белән тәмамланды.

Гөлназ ГЫЙЗЗӘТУЛЛИНА