Татарстанда чиркәү яндыруда шикле затлар тоткарланды

Татарстан Республикасы буенча Эчке эшләр министрлыгы һәм Федераль куркынычсызлык службасының ТР буенча идарәсе хезмәткәрләре республикабыз территориясендә кимендә ике православие чиркәвенә ут төртүдә шикле дип табылган чистайлылар төркемен тоткарлады.

Тоткарланучылар - традицион булмаган ислам диненә табынучы 22-35 яшьлек яшьләр сөйләвенә караганда, чиркәүләрне яндыру идеясе аларда быелның сентябрь аенда ук туган, әмма аны тормышка ашырырга ныклап карар итүләре ноябрь урталарында булган.

16 сыннан 17 ноябрьгә каршы төндә, төн урталары җитеп килгәндә егетләрнең 22 яшьлеге янына үзенең ВАЗ-2112 машинасында 30 яшьлек танышы килә һәм ут төртүләрне Чистайның Вишневский урамында төзелеп килә торган гыйбадәтханәдән башларга тәкъдим итә. Һәм бензин салынган шешәләре инде әзер булуын әйтә.

Төнге сәгать бер белән ике арасында алар «вазифаларны бүлешәләр»: берсе чиркәүнең бүрәнә стеналарына бензин сибеп чыга, икенчесе үзе ясаган фитильгә ут төртеп, бензин тутырылган шешәне бина стенасына бәреп вата. Вандаллар тиз арада җинаять урыныннан кача. Бәхеткә, каравылчының утны вакытында күреп алуы нәтиҗәсендә янгынны тиз арада сүндерүгә ирешәләр.

Иртәнге сәгать бишләр тирәсендә җинаятьчеләр Яңа Чишмә районының Ленино авылында да шундый ук гамәлләр кыла. Бу юлы инде янучан сыеклык салынган ике шешә кулланыла. Нәтиҗәдә гыйбадәт йорты тулысынча янып бетә.

Ут төртүчеләрнең һәм аларның кулдашларының шәхесләре кыска гына вакыт эчендә ачыклана. Алар сак астына алына. Татарстан территориясендә башка православие храмнарына ут төртүдә дә аларның катнашы юк түгел дип фаразларга җирлек бар. Тикшерү эшләре бара.