Әлмәттә Ватан каһарманнары көнен билгеләп үттеләр

Татарстан нефтенең 60 еллыгы исемендәге шәһәр паркында ветераннар, ТР Әлмәт муниципаль районы башкарма комитеты, Социаль яклау идарәсе вәкилләре, кадет-укчылар Каһарманнар аллеясында исемнәре мәңгеләштерелгән атаклы якташларыбызны искә алып, үз ихтирамнарын белдерделәр.
Хәзерге вакытта илебез халкы Советлар Союзы Геройларын, Изге Георгий һәм Дан орденнары кавалерларын, Социалистик хезмәт Геройларын, Россия Федерациясе Геройларын һәм Хезмәт Даны орденының тулы кавалерларын хөрмәтли. Герой исемен йөртүчеләр – илебездә ихтирам казанган кешеләр. Башкаларга караганда күбрәк хезмәт куйган, үз үрнәгендә кешенең чиксез мөмкинлекләрен, рухи һәм ихтыяр көчен күрсәтә алган шәхесләр бүген дә безнең арабызда. Әлмәт муниципаль районында бер Россия Герое, дүрт Социалистик хезмәт герое, төрле дәрәҗәдәге Хезмәт Даны орденының өч кавалеры яши.
Чара парк кафесында дәвам итте. Монда Геройлар өчен бәйрәм концерты һәм төшке аш әзерләнгән иде.
ТР Әлмәт муниципаль районы башкарама комитеты җитәкчесенең мәгариф һәм мәдәният эшләре буенча урынбасары Василий Самойлов, район Башлыгы исеменнән чыгыш ясап, мәртәбәле кунакларга туган ил һәм шәһәр файдасына фидакарь гамәлләр кылганнары, югары уңышларга ирешкәннәре өчен рәхмәт белдерде:«Илебездә геройлар инкыйлабка кадәрге вакытларда ук булган. Геройларны истә тоту һәм хөрмәтләү аларның үзләреннән бигрәк, үсеп килүче буынга кирәк. Рәхмәт Сезгә! Бәхетле тормышта озак яшәгез!» - диде ул.

В.Самойлов чыгышыннан соң сүз Геройларның үзләренә бирелде. Аларның һәрберсе үзе турында сөйләде, үз гомеренә туры килгән авыр елларны искә алды һәм яшь буынга Ватанны яратырга һәм сакларга, югары ватанпәрвәрлек үрнәге булырга дигән нәсихәт җиткерде.
Бәйрәмдә шәрәфле кунакларга иң җылы һәм ихлас теләкләр, котлаулар яуды. Шәһәрнең иҗади коллективлары һәм башкаручылары аларны музыкаль бүләк белән сөендерде.
Ләйсән Дәрҗеманова

Әлмәт шәһәре Балалар һәм яшьләр эшләре идарәсенең хәбәрлек хезмәте
автор фотосы
Әлмәт дәүләт муниципаль хезмәт институты тәрҗемәсе