Эшмәкәрләргә “Әлмәт шәһәренең 60 еллыгы” юбилей билгеләре тапшырылды

2013 ел тәмамланырга да саналулы гына көннәр калып бара. Узып баручы ел нефть башкаласы Әлмәт шәһәре оешуга –60, Татарстан нефте табылуга –70 ел тулу белән тарихка кереп калды. Агымдагы елда калада һәм район җирлегендә икътисади үсешне тотрыкландыру, социаль объектлар салу, төзекләндерү һәм ремонт эшләре киң колач белән башкарылды. Әлеге уңай үзгәрешләрне башкаруга барлык тармак хезмәтчәннәре белән бергә урта һәм кече бизнес вәкилләре дә үзләреннән лаеклы өлеш кертте. Бүген 6 декабрь көнне муниципалитетның кече залында шәһәр төзелешенә үзләреннән лаеклы өлеш керткән эшмәкәрләргә “Әлмәт шәһәренең 60 еллыгы” юбилей билгеләрен тапшырдылар. Бүләкләүләрне Башкарма комитет җитәкчесенең икътисад буенча урынбасары Айдар Каюмов алып барды.

“Урта һәм кече бизнес вәкилләре өлешенә барлык бюджет керемнәренең13–14 проценты туры килә. Сезнең белән безнең алда әлеге күрсәткечне 15 процент һәм аннан да югары итү бурычы тора. Бүген биредә эшмәкәрлекнең башында торган, әгәр шулай дип әйтергә яраса, аксакаллары җыелган. Шәһәрнең көннән– көн төзекләнә баруында сезнең дә хезмәтегез зур. Район башлыгы Мәҗит Салихов, Башкарма комитет җитәкчесе Марат Гирфанов һәм шәхсән үзм исемемнән олы рәхмәтемне җиткерәм, юбилей даталары, киләсе Яңа еллар белән тәбрик итеп эшләрегезнең уңышлы, гаиләләрегезнең имин булын телим,”– диде ул котлау сүзендә.

Урта һәм кече бизнес вәкилләре исеменән “Интурмед” ның җитәкчесе Азат Шәйхетдинов һәм “АИСК” ААҖ генераль директоры Наил Миннәхмәтов чыгыш ясадылар. Күрсәтелгән игътибар өчен алар район җитәкчелегенә барлык эшмәкәрләр исеменнән рәхмәт әйттеләр, киләчәктә “Эшмәкәрлеккә ярдәм итү департаменты” белән берлектә үз эшләрен башлаган яшьләр белән даими рәвештә очрашулар уздырырга дигән, тәкъдим керттеләр. Бүләкләү тантанасы гомуми фотога төшү белән тәмамланды.

Фәрдия Хәсәнова, “Альметьевский вестник” газетасы