Әлмәт театры сәхнәсендә – «Ромео һәм Джульетта»

Әлмәт татар дәүләт драма театры киләсе елга үзенең 70 еллык юбилеен билгеләп узачак. Әлеге олы датага иҗат коллективы зур һәм яңа уңышлар белән килә.

Быелгы 69 нчы сезонда тамашачыларга Таҗи Гыйззәтнең "Кыю кызлар" премьерасы тәкъдим ителеп уңыш казанган иде. Шунысы сөенечле, Әлмәт театры милли кыйммәтләребезне халыкка җиткерүдән тыш, дөнья классикасына да игътибарны киметми. Әлмәт театрына уңыш һәм танылу алып килгән "Гашыйк Кәриб" һәм "Туй" спектакльләре шундыйлардан.

5 декабрь көнне Әлмәт драма театрында инглиз драматургы Уильям Шекспирның "Ромео һәм Джульетта" трагик әсәре буенча куелган спектакль беренче тапкыр театр белгечләре, тәнкыйтьчеләр һәм журналистлар хозурына тәкъдим ителде.

Фаҗигале мәхәббәтне гәүдәләндерүче спектакльне сәхнәгә режиссер Искәндәр Сакаев куйды.

Пьесаны татарчага яшь шагыйрь Рүзәл Мөхәммәтшин тәрҗемә иткән, рәссам - Софья Тюремнова. Гасырлардан гасырларга яшәп килгән мәхәббәт кыйссасын без бер сулышта карадык. Әсәр тарихи һәм заманча элементларның тәңгәл үрелеше, ут, тавыш композициясе, хәрәкәткә бай күренешләр, хис, тойгыларның тирән чагылышы белән үзенә җәлеп итә. Син үзең дә сизмәстән ул чор вакыйгалары ташкынында яши, геройлар өчен борчыла башлыйсың. Ромеоны уйнаучы яшь артист Динар Хөснетдинов һәм Джульетта ролендәге Эльмира Яһудина өчен әлеге премьера чын мәгънәсендә зур сынау булды.

Тамашачылар спектакльне сәхнәдә утырып, артистларның һәр сулышын, Һәр хәрәкәтен күзәтеп карый алалар. Премьера тамашачыга 7, 8, 9 декабрь көннәрендә тәкъдим ителәчәк.Спектакльдә Дая ролен башкаручы Татарстанның халык артисткасы Раушания Фәйзуллинаның юбилей кичәсе дә премьера белән бергә булачак.

Фәрдия ХӘСӘНОВА