Брейк-данс биючеләр Әлмәттә коррекцион мәктәп укучылары өчен мастер-класс оештырды

Иганәчеләрнең актив катнашында 19нчы коррекцион мәктәп укытучылары үз укучыларына мавыктыргыч чара оештырдылар. Мәктәпнең актлар залы балаларның шатлыклы көлүләреннән яңгырап торды. Кунакларны сәламләп, алар рәхәтләнеп кул чапты! Веселинка һәм Бим исемле шук шамакайлар белән бергә шигырьләр укыды, ноталар буенча мультфильмнарны атады, үз урыннарында биеде балалар. Сабын куыклары шоуы артистлары кечкенә тамашачыларны җыр һәм биләр белән шатландырды.

Бәйрәмнең иң көтелгән вакыйгасы исә брейк-данс мәктәбе шәкертләре һәм аларның җитәкчесе Артем Кошеваров белән очрашу булды. Бу егет брейк-данс белән ун елдан артык шөгыльләнә һәм инде биш ел буе балаларны да үз һөнәренә өйрәтә.

Артема Кошеваров шәкертләре укытучылары өйрәткәннәрнең барысын да күрсәттеләр. Бу искеткеч тамаша булды! Балалар сәхнәдә күрсәтелгән һәр бию элементын бар күңелләрен биреп, дәрләнеп, мавыгып башкардылар. Залдагы малай һәм кызлар бу биюләрне ике күзләре белән карап утырды, кайберләре дәрләнеп китеп үзләре дә биеп карады.

Республикакүләм, россиякүләм, халыкара ярышларда зур уңышларга ирешкән Артем Кошеваров та үз осталыгын күрсәтте. Очрашу азагында брейк-данс мәктәбе шәкертләре укучыларга мастер-класс күрсәтте. Теләгән һәр кеше, сәхнәгә чыгып, дәрле көйгә ияреп берничә элемент ясап карады. Күбесе бу эшне бик җиңел башкарды, үзләрен ниндидер яңа шөгылҗдә сынап карау аларга шатлык кына!

“Брейк-данска өйрәнү бер дә авыр түгел, теләк кенә булсын!” – дип ышандырды балаларны Артем Кошеваров һәм барлык теләүчеләрне үз мәктәбенә чакырды.

Бәйрәмнән балалар бик күп уңай тәэсирләр, игелек, шәфкать, күтәренке күңел көче алып калдылар. Иганәчеләр өләшкән тәм-томнар да шатлык өстенә шатлык өстәде.

Әлмәт дәүләт муниципаль хезмәт институты тәрҗемәсе