Әлмәттә «Сугышчан туганлык»ның Әлмәт бүлеге ветераннары Чечня сугышында һәлак булганнарны искә алдылар
Әлмәттә Чечен Республикасында кораллы низаг вакытында һәлак булган хәрбиләрне искә алу көненә багышланган митинг-реквием узды. 31 ел элек, 1994 елның 11 декабрендә, федераль гаскәрләр конституцион тәртипне торгызу өчен Чечня территориясенә керәләр. Бу сугыш меңләгән хәрбиләрнең һәм тыныч халыкның гомерен өзде, һәлак булучылар арасында Татарстанда туганнар да бар.
«Сугышчан туганлык» ның Әлмәт бүлеге ветераннары шәһәр халкы белән бергә Хәтер мәйданына геройларны искә алу өчен җыелдылар.
Әлмәт «Сугышчан туганлык» җитәкчесе Юрий Максимов җыелучыларга мөрәҗәгать итте:
«Бүген без төньяк Кавказның кырыс шартларында үз бурычларын намус белән үтәүчеләрне искә алабыз. Алар безнең илнең бөтенлеген яклап, антларына ахырга кадәр тугры булып киттеләр. Безнең изге бурычыбыз-аларның һәрберсе турында истәлекне саклау, аларны балаларына һәм оныкларына тапшыру, бу кешеләрнең батырлыгы һәм фидакарьлеге беркайчан да онытылмасын өчен».
Митингта катнашучылар һәлак булганнарны бер минут тынлык белән искә алдылар һәм мемориалга чәчәкләр салдылар.
Бу дата-кайгы көне генә түгел, ә Россия сугышчыларының батырлыгы һәм ныклыгы өчен горурлык көне дә. Бу вакыйгаларда катнашучыларның күбесе күрсәткән батырлыклары һәм каһарманлыклары өчен дәүләт бүләкләренә лаек булды.
Россиянең тынычлыгы һәм бердәмлеге өчен гомерләрен биргән геройларга мәңгелек истәлек.