Депутатлар Интернетта наркотикларны рекламалаучыларны җинаять җаваплылыгына тартырга тәкъдим итәләр

Кичә “Наркоманияне булдырмауны һәм гражданнарның тормышы һәм сәләмәтлеге куркынычсызлыгын тәэмин итүне закон нигезендә тәртипкә салуның өстәмә чаралары хакында”дигән темага Дәүләт думасында узган түгәрәк өстәл утырышында наркоманияне булдырмау чараларының нәтиҗәлелеге турында фикер алыштылар. Әңгәмәдә Дәүләт Думасы депутатлары, Наркотиклар әйләнешен контрольдә тоту Федераль хезмәте, Россия Эчке эшләр министрлыгы, Мәгариф һәм фән министрлыгы, Россия Сәламәтлек министрлыгы, РФ Тикшерү комитеты вәкилләре катнашты.

Дәүләт думасының Коррупциягә каршы тору һәм куркынычсызлык комитеты рәисе Ирина Яровая Интернетта наркотикларны рекламалаучыларны җинаять җаваплылыгына тартырга тәкъдим итте. Шулай ук наркоманнарга һәм аларның гаиләләренә ярдәм итү ысулларын киңәйтү кирәклеген ассызыклады, моның бер чарасы итеп наркомания белән интегүчеләр өчен махсус реабилитацияләнү комплекслары ачуны күрсәтте.

Россиянең Наркотиклар әйләнешен контрольдә тоту Федераль хезмәте мәгълүматларына караганда, Россиядә наркотик кулланучыларның саны 8 млн. Дәүләт идарәсе тармагы җитәкчесе Виктор Иванов билгеләвенчә, наркоманиягә бирешү дәрәҗәсе турыдан-туры төбәкнең иҗтимагый-икътисади үсешенә бәйләнгән, шуңа да наркомания таралышына каршы торуның төп факторы булып яшьләрнең буш вакытын төрле чаралар белән тәэмин итү санала. Ул мәктәп балаларының наркотик куллану-кулланмавын күрсәтә торган тестлар үткәрүне дә тәнкыйтьләде, үз фикерен ачыкланган наркоманнарга наркотиклардан баш тарту өчен тиешле ярдәм күрсәтелмәве белән аңлатты. "Бүген ярдәм үлем хәленә җиткән наркоманнарга гына күрсәтелә. Кешегә наркоманиягә бирешә генә башлаган чагында ук ярдәм күрсәтелсә, наркоманиягә каршы көрәш нәтиҗәлерәк булыр иде", – диде Иванов.

РФ Эчке эшләр Министры урынбасары Александр Горовой хәбәр итүенчә, соңгы биш ел эчендә наркотиклар куллану һәм таратуга бәйле кылынган җинаятьләрнең саны миллионнан артып китә Агымдагы елның тугыз ае дәвамында наркотик исереклеккә бирелеп башкарылган җинаятьләр саны, узган елгы белән чагыштырганда, ике мәртәбә арткан.

РФ Сәламәтлек Министры урынбасары Татьяна Яковлева наркотик кулланучылар белгечләргә үзләре мөрәҗәгать итсен өчен берәр төрле кызыктыру чаралары кирәклеген яклап чыга.

РФ Тикшерү комитеты рәисе урынбасары Александр Федоров исә, наркоманияне булдырмауның иң яхшы ысулы – наркотикларның законсыз әйләнеше һәм таратылуы өчен хөкемнең котылгысызлыгын аңлау дип, саный.

Утырыш нәтиҗәләре буенча Ирина Яровая депутатларның наркомания белән интегүчеләр өчен махсус реабилитацияләнү үзәкләре системасын оештыру программасын эшләүгә юнәлдерелгән финанслауны арттыруны яклаячакларын белдерде. Түгәрәк өстәл утырышында катнашучылар наркоманияне булдырмау һәм наркотикларны таратуга каршы көрәш өлкәсендәге кануннамәләрне камилләштерү буенча тәкъдимнәр дә әзерләделәр.

Чыганак: ИА "ГАРАНТ"