Ел ахырына кадәр Татарстанда яшь пар туй тантанасын оештыруга 100 мең алырга мөмкин

2025 елның 16 октябре, пәнҗешәмбе

Быел җәй көне Татарстан Республикасында Татарстан Республикасы Рәисе Рөстәм Миңнеханов ярдәме белән яшьләр эшләре министрлыгы тарафыннан яшь гаиләләргә ярдәм итү өчен «Яшь парларга грантлар» уникаль социаль проекты эшләтеп җибәрелде. Проект 2025 ел ахырына кадәр гамәлдә булачак.

Конкурста җиңүчеләр 100 000 сум күләмендә акчалата бүләкләр ала, алар никахны дәүләт теркәвенә алу һәм туй тантанасын оештыруга бәйле чыгымнарны түләүгә юнәлдерелергә мөмкин.

Ничек гариза бирергә?

• «ТР Хезмәтләре 2.0» кушымтасы аша
• Татарстанда кимендә өч ел яшәгән, ЗАГСка гариза биргән 18 яшьтән 35 яшькә кадәрге парлар катнаша ала.

Сүз уңаеннан, проектның инде беренче җиңүчеләре бар! Әлмәттән килгән яшь пар 100 000 сумлык сертификат алган бәхетле парларның берсе булды. Алар кушымта аша гариза бирделәр һәм откан акчаларын туй тантанасын оештыруга юнәлттеләр.