Дәминовлар-Вәлиәхмәтовларның педагогик династиясе сайлауларда катнашты
Сөләй авылында Дәминовлар-Вәлиәхмәтовларның педагогик династиясе сайлау участогына милли киемнәр киеп, гореф-гадәтләргә һәм мәдәнияткә тугрылык символы буларак килде.
Бу гаилә хаклы рәвештә уникаль санала: аларның гомуми педагогик стажы 450 елдан артык һәм дүрт буынны үз эченә ала!
Династиягә нигез салучы Рабига Вәлиәхмәт кызы Дәминова (Еремеева) була, ул гаиләдә мәгърифәтчелек эшенә хезмәт итү традициясенә нигез сала. Аның кызлары Лена һәм Лира Даминовлар әниләренең педагогик эшен дәвам итәләр. Лена Мотыйговнаның ире Әнвәр Таҗимөхәммәт улы Вәлиәхмәтов та гомерен мәктәпкә һәм балалар белән эшләүгә багышлады.
Лена белән Әнвәрнең өч кызы-Рәмзия, Гүзәлия һәм Гөлнара — белемгә мәхәббәт һәм укытучы һөнәренә хөрмәт белән карап үстеләр. Аларның да, гаилә мирасын саклап һәм арттырып, педагогик юлны сайлавы гаҗәп түгел.
Рәмзия Әнвәр кызы 40 елдан артык Яңа Кәшер авылында балалар бакчасы белән җитәкчелек итә. Гүзәлия Әнвәр кызы-Р.Г. Галиев исемендәге Сөләй урта мәктәбе директоры, ә Гөлнара Әнвәр кызы «Адымнар-Әлмәт» полилингваль гимназиясендә тарих һәм җәмгыять белеме укыта.
«Сөләй авылында бердәмлек атмосферасы хөкем сөрә! Халык сайлауларга актив килә. Барысы да тавыш бирүдә катнашуның мөһимлеген аңлый һәм республиканың киләчәген бергәләп хәл итәчәкләренә ышана», - диде мәктәп директоры Гүзәлия Әнвәр кызы.