Пермьдә «МолоТ» яңа яшьләр проектының финалы тәмамланды
Узган ялларда Пермьдә эшләүче яшьләргә юнәлдерелгән «МолоТ» (Яшьләр хезмәте) Идел буе федераль округы иҗтимагый проектының финалын ябу тантанасы булды.
Проект Россия Президентының Идел буе федераль округындагы Тулы вәкаләтле вәкиле Юрий Комаров патронаты астында гамәлгә ашырыла һәм илдә мондый масштабтагы беренче чара булды. Аның финалы округның 14 төбәгеннән 420 катнашучыны берләштерде – икътисадның реаль секторы предприятиеләренең 18 яшьтән 35 яшькә кадәрге яшь белгечләрен, шул исәптән балалы яшь гаиләләрне дә.
Проектның сайлап алу этаплары зур кызыксыну уятты: аларда округның 394 предприятиесеннән 16 меңнән артык кеше катнашты. Татарстанны реаль секторның алты әйдәп баручы компаниясе тәкъдим итте: «Татнефть» ГАҖ, «КАМАЗ» ГАҖ, «Казанкомпрессормаш» ГАҖ, «Казан вертолетлар заводы», «Түбән Кама Нефтехим» (СИБУР) һәм «Казаноргсинтез» (СИБУР).
«Татнефть» компаниясеннән финалга дүрт хезмәткәр чыкты. Әлмәттән Иван Осипов, Руслан Блаченов һәм Ирек Бакиров җиңел атлетика эстафетасында төбәкне тәкъдим иттеләр.
Финал программасына интеллектуаль турнирлардан һәм иҗади конкурслардан алып спорт дисциплиналарына кадәр ярышларның 12 юнәлеше кертелгән иде. Катнашучылар мини-футбол, волейбол, җиңел атлетика эстафетасы, 5000 метрга йөгерү, өстәл теннисы, шахмат, шәһәр спорты һәм спорт ориентирлашу буенча ярыштылар. Шулай ук аерым блокка бүленгән квизлар һәм гаилә ярышлары да узды.