«Дөньяда иң бәхетлесе — мин»: Августина Ивановна Туймеева үзенең юбилеен бәйрәм итә
Бүген, 9 августта, атказанган педагог, хезмәт ветераны һәм талантлы кул эшләре остасы Августина Ивановна Туймеева үзенең 90 яшьлек юбилеен билгеләп үтә. Әлеге истәлекле вакыйга уңаеннан Әлмәт муниципаль районы башкарма комитеты җитәкчесе Гүзәл Хәбетдинова юбилярны шәхсән үзе котлады, аның күпьеллык хезмәте һәм иҗади мирасы өчен тирән рәхмәтен белдерде. Җитәкче Әлмәттә яшәүчеләр исеменнән юбилярга нык сәламәтлек, иминлек, туганнары һәм якыннары арасында озын гомер теләде.
Августина Ивановна 1935 елның 9 августында Чита шәһәрендә туа. 1955 елда ул Чистай авыл хуҗалыгы техникумын тәмамлый, «Урман һәм авыл хуҗалыгы мастер-механигы»белгечлеге ала. Әмма аның чын максаты педагогика була, һәм ул гомеренең күп өлешен үсеп килүче буынны тәрбияләүгә һәм укытуга багышлый.
1969 елда Августина Ивановна тормыш иптәше — Бөек Ватан сугышы ветераны Михаил Ильич Туймеев белән Әлмәткә күчеп килә. Биредә ул күп еллар мәгариф өлкәсендә эшли, укучыларының һәм хезмәттәшләренең йөрәкләрендә якты эз калдыра.
1990 елдан Августина Ивановна лаеклы ялда, әмма актив тормыш рәвеше алып баруын дәвам итә. Аның төп мавыгуы — бәйләү, аңа ул буш вакытын багышлый. Олы яшьтә булуына карамастан, ул гаҗәеп әйберләр-җылы шәлләр, челтәрле яулыклар, уңайлы свитерлар һәм хәтта оныклары өчен уенчыклар тудыра.
Августина Ивановна дүрт бала тәрбияләп үстергән, ә бүген аның тормышы биш оныгы һәм сигез оныкчыгы белән аралашу шатлыгы белән тулы.
«Дөньяда иң бәхетлесе - мин!»- ди юбилярша елмаеп.
Гүзәл Хәбетдинова визиты вакытында Августина Ивановна аңа рухи юмартлык һәм сүнми торган иҗади ут символы буларак куллары белән бәйләнгән нәфис яулык бүләк итте.
Августина Ивановнага нык сәламәтлек һәм бетмәс-төкәнмәс энергия телибез!