Гүзәл Хәбетдинова һәм Азат Кадыйров «Мәктәпкә җыенырга ярдәм ит» акциясенә старт бирделәр

2025 елның 8 августы, җомга

Яңа уку елы алдыннан Әлмәт районында «Мәктәпкә җыенырга ярдәм ит» дигән традицион хәйрия акциясе старт алды.

2007 елда Татарстан Республикасының Беренче Президенты Минтимер Шәрип улы Шәймиев тәкъдиме белән барлыкка килгән бу яхшы инициатива елдан-ел Әлмәт халкын ярдәмгә мохтаҗларга ярдәм итү теләгенә берләштерә. Быел 250 яшь әлмәтле ярдәм алачак.

Бүген, Ринат Галиев урамы, 23 нче йорт ишегалды бәйрәме вакытында, район башкарма комитеты җитәкчесе Гүзәл Хәбетдинова һәм ТР Җир һәм милек мөнәсәбәтләре министры Азат Кадыйров МХО зонасында булачак сигез беренче сыйныф укучысына кирәкле уку кирәк-яраклары тутырылган мәктәп рюкзаклары тапшырдылар.

Акциядә теләге булган һәркем катнаша ала. Үз өлешләрен кертергә теләүчеләр Р.Фәхретдин урамы, 50/1, 301 кабинет - Әлмәт муниципаль районы мәгариф идарәсе адресы буенча мәктәп кирәк-яраклары алып килә алалар.