Әлмәт районында «Безнең ишегалды» программасы буенча эш кызу бара

2025 елның 8 августы, җомга

«Безнең ишегалды» республика программасы һәм ТР рәисе Рөстәм Миңнеханов инициативасы нәтиҗәсендә Әлмәт районы киң колачлы төзекләндерү кичерә. Көз башына 51 ишегалды территориясен яңартуга 474 млн сумнан артык акча юнәлдерелгән.

Чехов ур., 16, 18 нче йортларда асфальтның өске катламын салуга әзерлек эшләре төгәлләнеп килә. Күп кенә ишегалларында эшләр тулысынча төгәлләнгән инде, һәм халык уңай үзгәрешләрне шатланып күзәтә. 18 объектта эшләр актив темпта алып барыла.

ТР рәисе Рөстәм Миңнеханов инициативасы белән оештырылган «Безнең ишегалды» программасы уңайлы шәһәр мохите булдыруга юнәлдерелгән. Ишегалды территорияләре төзекләндерелгән күпфункцияле зоналарга әверелә, анда һәр кеше күңеленә хуш килгән шөгыль таба алачак.

2020 елда башланган программаны гамәлгә ашыру чорында Әлмәттә инде 300 ишегалды төзекләндерелгән. Быел аларга тагын 51 өстәләчәк, бу шәһәр халкының тормыш сыйфатын яхшыртырга мөмкинлек бирәчәк.