14 сентябрьдә Татарстанда республика башлыгын сайлаулар узачак

2025 елның 24 июле, пәнҗешәмбе

Бүген Татарстан Республикасы Рәисе вазыйфасына кандидат буларак теркәлү өчен документларны Рөстәм Миңнеханов тапшырды.

«Без сайлау кампаниясенең икенче этабына – кандидатларны теркәүгә кердек. Кампаниядә катнашучыларның барысының да шартлары бертигез: алар тиешле документларны тапшыралар, тикшерү узалар, муниципаль фильтр процедурасы кысаларында имзалар җыялар. Аларның һәрберсе буенча закон тарафыннан билгеләнгән вакытта карар кабул ителәчәк», - дип ассызыклады ТР Үзәк сайлау комиссиясе рәисе Андрей Кондратьев.

Сайлаулар 14 сентябрьдә узачак. Сәяси партияләр тарафыннан дүрт кандидат күрсәтелде: Рөстәм Миңнеханов («Бердәм Россия»), Хафиз Миргалимов (КПРФ), Руслан Йосыпов (ЛДПР), Виталий Смирнов («Социаль гаделлек өчен Россия пенсионерлар партиясе»).