Габдрахман мәдәният йортында халык ансамбльләре үз исемнәрен якладылар

Әлмәт муниципаль районында дус һәм тату булып күп төрле милләт вәкилләре яши. Аларның һәрберсе үз мәдәниятен, гореф– гадәтләрен саклау, яшь буынга җиткерү юнәлешендә зур эшләр башкара. Озак еллардан бирле сәхнә түрләрен балкыткан, районда гына түгел, республикада танылу алган, лаеклы рәвештә халык ансамбле исемен йөртүче коллективларның күп булуы нефть башкаласында мәдәни эшнең тиешле югарылыкта оештырылуын күрсәтә.

Узган шимбәдә Әлмәт районының капкасы булган Габдрахман мәдәният йортында берничә коллектив үзләренең халык ансамбле исемен йөртүгә тагы бер кат имтихан тотып, аны йөртергә хаклы булуларын расладылар. Иҗатчыларның чыгышларын ТР Мәдәният министрлыгы каршысында эшләп килүче “Традицион мәдәниятне үстерү республика үзәге” директоры урынбасары Гали Габдрахманов, баш белгеч, Мәдәният университетының өлкән укытучысы Татьяна Чекмарева, фәнни хезмәткәр, ТР ның Атказанган сәнгать эшлеклесе, танылган композитор Риф Гатауллин бәяләде.

“Халык” исемен беренче булып “Кәләем” керәшен фольклор ансамбле яклады. Теләсә – кайсы концерт программасының бизәге булырдай әлеге коллектив адресына комиссия әгъзалары бары тик мактау сүзләре генә әйттеләр.

Яшьләр бистәсенең “Руссские узоры” рус халык җырлары ансамбле үзенең дәртле һәм халыкчан көйләре белән тамашачыларның мәхәббәтен яулый. Комиссия әгъзалары репертуарның дөрес сайлануын, профессиональ башкару осталыгы булуда аның җитәкчесе Валерий Саматовның өлеш зур булуын ассызыклап, олы рәхмәт әйттеләр.
Чуваш халык ансамбле “Саспель” үз халкының фольклорын эзләп табу, аны халыкка җиткерү, саклау юнәлешендә киң колачлы эш алып бара.Музыкаль бизәлешсез, төрле буын кешеләренең күмәк булып халык җырларын башкаруларын зал алкышлап бәяләде.

“Халык” исемен яклау чыгышын Габдрахманның “Авылым йолдызлары” һәм “Сәрбиназ” ансамбльләре дәвам итте. Габдрахманлылар халык иҗатының барлык үрнәкләре дә чагылыш тапкан “Аулак өй” күренешләре, заманча таләпләргә җавап бирерлек итеп куелган биюләр күрсәттеләр. Узган ел үзенең оешып эшли башлавына 30 ел тулуны билгеләп узган, Россия, күп кенә чит илләрдә уздырылган бәйгеләрнең лауреаты булган җыр һәм бию ансамбле ,әлбәттә инде, комиссия әгъзаларының иң югары бәясенә лаек булды.

Кунакларны һәм һәвәскәр артистларны шулай матур итеп каршы алганнары, чараны сәнгать бәйрәменә әверелдергәннәре өчен “Традицион мәдәниятне үстерү республика үзәге” белгечләре Габдрахман авылы башлыгы Өлфәт Усмановка , авыл мәдәният йорты директоры Сәрия Лукошковага, район мәдәният йорты белгечләренә олы рәхмәтләрен белдерделәр.

Фәрдия Хәсәнова, “Альметьевский вестник” газетасы