Иске Суркино авылында яңа ФАП төзү дәвам итә

2025 елның 30 июне, дүшәмбе

«Озак һәм актив тормыш» илкүләм проекты кысаларында Әлмәт районының Иске Суркино авылында «Татарстан Республикасының беренчел сәламәтлек саклау звеносын модернизацияләү» программасы буенча фельдшер-акушерлык пункты төзелеше дәвам итә.

Заманча блок - модульле ФАП диспансерлаштыру, вакцинацияләү, ЭКГ һәм башка мөһим медицина хезмәтләре күрсәтү өчен барлык кирәкле җиһазлар белән җиһазландырылачак. Эчтә процедура, прививка ясату, стерилизация кабинетлары һәм даруларны саклау бүлмәсе булачак.

Хәзер төзүчеләр бинаны урнаштыруны төгәлләделәр һәм эчке бизәүгә, челтәрләр үткәрүгә һәм пандус урнаштыруга керештеләр. Төзелешне август ахырына тәмамлау планлаштырыла.

Яңа ФАП авылның 715 кешесенә хезмәт күрсәтәчәк һәм медицина ярдәменең сыйфатын яхшыртырга мөмкинлек бирәчәк!