Әлмәттә «Татнефть» компаниясенең 75 еллыгын билгеләп үттеләр
Тантана Татарстан нефтенең 60 еллыгы исемендәге паркта Социалистик Хезмәт Геройлары бюстларына чәчәкләр салудан башланды. Тантанада катнашучылар бер минут тынлык белән «Татнефть»нең чәчәк атуына нигез салынган күренекле эшлеклеләрне искә алды.
Бәйрәмнең беренче өлешенең кульминациясе булып хезмәт коллективларының Ленин мәйданыннан «Каракүз» скверына кадәр тантаналы узуы булды. Чарада «Татнефть» компанияләр төркеменең 7 меңнән артык хезмәткәре, район һәм предприятиеләр администрациясе вәкилләре, шулай ук шәһәр һәм район халкы катнашты.
Бәйрәмнең рәсми өлеше «Каракуз» скверы янында узды. Сәхнәдән алып баручылар Россия Федерациясе Президенты Владимир Путин, РФ энергетика министры Сергей Цивилев һәм Татарстан Республикасы Рәисе Рөстәм Миңнехановның котлауларын укыдылар.
Җыелучыларга котлау сүзләре белән Әлмәт муниципаль районы башкарма комитеты җитәкчесе Гүзәл Хәбетдинова һәм «Татнефть» профсоюзы рәисе Рифдар Хәмәдьяров мөрәҗәгать итте. Алар «Татнефть» компаниясенең районның икътисадый һәм социаль үсешендә әһәмиятле ролен билгеләп үттеләр, хезмәткәрләргә һөнәри осталыклары һәм эшкә тугрылыклары өчен, ә ветераннарга нефтьчеләрнең яшь буынына бәһасез тәҗрибәләре өчен рәхмәт белдерделәр.
Рәсми өлештән соң шәһәр халкын һәм кунакларны бай күңел ачу программасы көтә иде. Мәйданчыкта чын бәйрәм тамашасы: артистлар чыгышы, театрның «Җиңел канатлар» курчаклары һәм сихерләп торучы тере сыннар башланды.