Мәҗит Салихов шәһәрдәге төзелеш объектларында булды

Әлмәт муниципаль районы башлыгы Мәҗит Салихов башкарма комитет җитәкчесенең төзелеш буенча урынбасары Илвир Габдуллин белән берлектә шәһәрнең төп төзелеш объектларында булды. Беренче тукталыш “Көнбатыш капка “ микрорайонындагы 9 катлы йорт янында булды. Аның инвесторы ТР Дәүләт торак фонды, заказчысы “Арслан” җаваплылыгы чикләнгән җәмгыять. Бүгенге көндә төзелеш тәмамланган диярлек, эчке ремонт, тирә-якны төзекләндерү эшләре бара.

“Объектта 300дән артык кеше эшли. Атна ахырына кадәр инженер челтәрендә эшләрне тәмамлау күздә тотыла. Бүгенге көндә йортка җылы бирү белән мәшгульбез. Параллель рәвештә, машина кую өчен мәйдан әзерләнә. Билгеләнгән вакытка объектны тапшырачакбыз, – ди “Арслан” фирмасының техник директоры Айрат Мөхәммәтҗанов.

Шушы ук районда федераль программа буенча 270 урынлык балалар бакчасы төзелеше бара. Объект төзелеше агымдагы елның февраль аенда башланган һәм 80 процентка төгәлләнгән.

Район башлыгы “Яшьлек” микрорайонындагы 260 урынга исәпләнгән балалар бакчасы төзелеше белән дә танышты. Илвир Габдуллин сүзләренә караганда, объектның нигезен салу тәмамланган, төзелеш план буенча дәвам итә.

Рейд вакытында район башлыгы барлык төзелеш объектларында да эшләрне үз вакытында һәм сыйфатлы итеп башкарырга кирәклегенә басым ясады.

Фәрдия Хәсәнова әзерләде