Кәләй авылы халкы безнең сугышчыларга ярдәм итә

2025 елның 18 марты, сишәмбе

Ватанны саклаучылар елында тылда эшләүчеләр, үзләрен, вакытларын, гомерләренең бер өлешен фронттагы сугышчыларга ярдәм итү өчен бирүчеләр турында сөйләвебезне дәвам итәбез!

Махсус хәрби операция башланганнан бирле Кәләй авылы халкы берләшеп, җирле мәдәният йортында гуманитар ярдәм штабы оештырган.

Штаб эшләгән вакытта волонтерлар 120 пар җылы оекбаш бәйләделәр һәм фронтка озаттылар, 60 литр өй токмачы һәм 600 окоп шәме ясадылар, 3х6 метр зурлыктагы 30 маскировка челтәре үрделәр.

Моннан тыш, укучылар солдатларга хатлар яза һәм открыткалар ясый, ә балалар бакчасында тәрбияләнүчеләр сугышчылар өчен чәй әзерли.

Штабта көн саен 20 битараф булмаган кеше эшли. Волонтерлар командасына 8-965-615-24-01 телефоны буенча теләгән һәркем кушыла ала.