Татарстан территориясендә тимер юл тармагын үстерү перспективалары

Бүген Хөкүмәт йортында Татарстан территориясендә тимер юл тармагын үстерү перспективаларына багышланган киңәйтелгән киңәшмә булып узды.
Аның эшендә ТР Президенты Р.Миңнеханов, “РТЮ” вице-президенты А.Краснощеков, Горький һәм Куйбышев тимер юллары җитәкчеләре А. Лесун белән С.Соложенкин катнашты
“Моңа кадәр 5 ел Казан Универсиадасын көтеп яшәгән булсак, хәзер югары тизлекле тимер юллар төзелешен көтеп яшибез”.ТР Президенты Рөстәм Миңнеханов. Киңәшмә “Россия тимер юллары” ААҖ узган 10 елдагы эшчәнлек нәтиҗәләренә һәм Татарстан территориясендә тимер юл тармагын үстерү перспективаларына багышланды.Татарстан Президенты форсаттан файдаланып “Россия тимер юллары” җәмгыятен 10 еллык юбилее белән котлап, тимер юлларның ил, республика үсешендә стратегик роль уйнавын билгеләп узды.

Татарстан территориясе Горький һәм Куйбышев тимер юлларының хезмәт күрсәтү зонасына керә. Республика территориясе аша узучы магистральләрнең гомуми озынлыгы 1800 км артып китә, тармакта 17 меңнән артык кеше хезмәт куя. Агымдагы елның узган 9 ае эчендә Татарстан территориясендә магистральләрдә 6,2 млн пассажир, 11 млн тоннадан артык йөк ташылган. “Тимер юлларның безнең өчен нинди әһәмияткә ия булуын аңлыйбыз. Ил Президенты алга куйган бурычларны хәл итү, республиканың социаль-икътисади үсеше белән бәйле программаларны гамәлгә ашыру өчен тимер юл транспорты өлкәсендә яңа инфраструктура проектлары кирәк”, -дип ассызыклады Рөстәм Миңнеханов үзенең кереш чыгышында. Ул соңгы елларда республикада гамәлгә ашырылган масштаблы проектлар - “ТАНЕКО”, Казан Универсиадасына әзерлек белән бәйле проектларның тимер юллар белән уртак хезмәттәшлек нәтиҗәсе булуын аерым искәртте.

“Кама кластерын үстерү стратегиясе буенча 2020 елга җитештерү темпларын 3 тапкырга арттырырга тиешбез. Үсеш белән бәйле амбицияле планнарыбызны гамәлгә ашыруда килешеп эшләрбез”, -дигән ышанычта калды Татарстан башлыгы. Рөстәм Миңнеханов моңа кадәр 5 ел республиканың Казан Универсиадасын көтеп яшәвен, хәзер исә өметләрнең югары тизлекле тимер юллар төзелеше белән бәйле булуына басым ясады.Аның фикеренчә, әлеге югары тизлекле магистраль илнең Европа өлешендәге ара ераклыгын сизелерлек кыскартырга ярдәм итәчәк. “Бу- яңа материаллар, яңа күчмә состав, тимер юллар системасының яңаруы гына түгел, ул менталитетны да үзгәртәчәк”, -ди Рөстәм Миңнеханов. ТР Президенты бүген югары тизлекле магистральнең Татарстан территориясе аша узачак оптималь маршруты эшләнүен җиткерде һәм республиканың барлык кирәкле шартларны тудырачагын ышандырды.

Фәрдия Хәсәнова әзерләде