"Сөючеләр фида кыла" телемарафонына беренче нәтиҗәләр ясалды

Приют өчен барлыгы 831 598 сум 56 тиен акча җыелган. Татарстан мөфтияте карамагындагы "Зәкәт” хәйрия фонды Корбан бәйрәме уңаеннан оештырган “Сөючеләр фида кыла” акциясенә беренче нәтиҗәләрне ясады.
Билгеле булганча, Татарстан нәзарәте “Яңа гасыр” каналы белән берлектә 15 октябрьдә “Сөючеләр фида кыла” телемарафонын уздырды. Әлеге телемарафон физик мөмкинлекләре чикле ятим балаларны тернәкләндерү өчен бинаны төзекләндерүгә ярдәм итү максатыннан үткәрелде.

Бүгенге көндә исәп-хисап счетында банклар аша күчерелгән 91 208 сум 48 тиен акча һәм кешеләр, үзләре алып килеп , исәп-хисап счетына салган 22 146 сум 08 тиен күләмендә акча җыелды. “ЗАКЯТ” сүзен язып, 7715 номерына җибәрелгән смс-хәбәрләр ярдәмендә барлыгы 718 244 сум акча тупланды. Шулай итеп, беренче нәтиҗәләр буенча приют өчен барлыгы 831 598 сум 56 тиен акча җыелды.

Әгәр дә бер смс-хәбәрне 50 сумнан дип санасак, акциядә якынча 15 меңләп кеше катнашкан дип карап була.

Шунысы да сөендерә: бик күпләр “Зәкят” хәйрия фондына матди ярдәм күрсәтүен дәвам итә. “Зәкят” хәйрия фонды Тукай урамы, 3 нче йорт адресы буенча урнашкан. Биредә фонд хезмәткәрләре хәйрия акчаларын кабул итә.

Хәзер дә һәркем инвалид ятимнәргә ярдәм кулы суза ала. Моның өчен 7715 номерына “ЗАКЯТ” сүзен смс-хәбәр итеп җибәрергә кирәк. 1 смс-хәбәр бәясе 50 сум (төгәл сумма операторга бәйле). Әгәр дә күбрәк хәер бирергә теләсәгез, “ЗАКЯТ” сүзеннән соң буш урын калдырырга һәм сумманы язарга кирәк.

Ф Сабалы