Әлмәттә сәяси репрессия корбаннарына һәйкәл ачылды

Сәяси репрессия корбаннары көне Россиядә рәсми рәвештә 1991 елның 30 октябреннән башлап билгеләп үтелә. Бу көнне хаксызга рәнҗетелгән, озак еллар җәбер һәм золым астында яшәргә мәҗбүр ителгән шәхесләр, аларның якыннарын искә алалар.

Әлмәт муниципаль районында сәяси репрессия корбаннары советы 1996 елның ноябрь аенда оеша. Беренче көннәрдә әлеге берлектә 79 кеше исәпләнә, советка керүчеләр тарафыннан ул болгавыр вакыйгаларга эләккәннәрне эзләү буенча киң колачлы эш алып барыла. Хәзерге вакытта сәяси репрессия корбаннары советында 140 кеше бар, шуларның 8 е Бөек Ватан сугышы ветераннарының тол калган хатыннары, 42 кеше төрле авырулар нәтиҗәсендә инвалидлыкта.

2012 елда Яшьләр үзәгендә булган очрашу вакытында нефтьчеләр башкаласында ул дәһшәтле еллар онытылмасын, яшь буынга тәрбия чарасы булсын дигән теләктән чыгып сәяси репрессия корбаннарына һәйкәл төзү турында карар кабул ителгән иде. Әлеге тәкъдим киң район җитәкчелеге һәм җәмәгатьчелектә яклау тапты. Һәм бер ел дигәндә, 29 октябрь көнне, хәрби комиссариат янындагы мәйданда Әлмәттә сәяси репрессия корбаннарына төзелгән һәйкәл тантаналы төстә ачылды. Чарада Башкарма комитет җитәкчесе Марат Гирфанов, репрессия корбаннарының балалары, оныклары, якыннары , студентлар һәм мәктәп укучылары катнашты. Башкарма комитет җитәкчесе район башлыгы Мәҗит Салихов исеменнән батырлыклары, авыр сынауларга бирешмичә илебезнең киләчәге өчен тырышып хезмәт иткән ветераннарга олы рәхмәтен белдерде.

Һәйкәлнең проекты Әлмәт муниципаль районының реклама һәм мәгълүмат департаменты тарафыннан ясалган. Аны булдыруга “Әлмәтнефть”, “Елховнефть” ,“Җәлилнефть”, СЗМН , “Татнефть –Ремсервис”, Әлмәт нефть институты һәм башка оешмалар матди ярдәм күрсәттеләр.

Һәйкәлне ачу тантанасы бер минутлык тынлык һәм сәяси корбаннарны искә алып чәчәкләр кую белән тәмамланды.

Фәрдия Хәсәнова, “ Альметьевский вестник” газетасы