Яңа ел бәйрәмнәрендә куркынычсызлык-Әлмәтнең террорчылыкка каршы комиссиясе утырышының төп темасы
16 декабрьдә Әлмәттә район башкарма комитеты җитәкчесе Гүзәл Хәбетдинова рәислегендә террорчылыкка каршы комиссиянең 2024 елда йомгаклау утырышы булды. Утырышта комиссия әгъзалары, хокук саклау органнары вәкилләре, оешма җитәкчеләре һәм авыл җирлекләре башлыклары катнашты.
«Яңа ел бәйрәмнәре барлык хезмәтләрнең максималь уяулыгын һәм оперативлыгын таләп итә. Провокацияләрне булдырмау, куркынычсызлык таләпләрен үтәү һәм экстремизмның теләсә нинди күренешенә вакытында җавап бирү мөһим», - дип ассызыклады Гүзәл Хәбетдинова.
Утырышта катнашучылар Яңа ел бәйрәмнәре һәм кышкы каникуллар чорында мәгариф, мәдәният, спорт һәм социаль өлкә объектларының террорчылыктан саклану мәсьәләләрен карадылар.
Россия Эчке эшләр министрлыгының Әлмәт районы буенча бүлеге полиция начальнигы урынбасары Ленар Рәхмәтуллин һәм Әлмәт районы буенча ОВО – «Татарстан Республикасы буенча Россия ВНГ УВО» ФГКУ филиалы җитәкчесе Рамзик Кюрегян кешеләр күп була торган урыннарны тикшерү нәтиҗәләре турында сөйләделәр һәм чараларны оештыруга төп таләпләрне билгеләделәр. Гүзәл Хәбетдинова ачыкланган кисәтүләрне бетерү буенча йөкләмә бирде.
Күзәтчелек эшчәнлеге һәм профилактика эше бүлегенең Әлмәт районы буенча начальнигы Равил Хөсәенов бәйрәм чорында янгын куркынычсызлыгы чаралары турында сөйләде. Ел башыннан районда 266 янгын теркәлгән, аларда 3 кеше һәлак булган һәм 15 кеше зыян күргән. Төп сәбәпләр - ут белән саксыз эш итү һәм электр җиһазларын эксплуатацияләү кагыйдәләрен бозу. 2024 елның 25 декабреннән 2025 елның 8 гыйнварына кадәр республикада махсус билгеләнгән урыннардан тыш пиротехника куллануны тыя торган махсус янгынга каршы режим гамәлдә. Әлмәттә бу биш мәйданчык: «Юбилейный» стадионы артындагы футбол кыры янындагы стоянка; шәһәр күле (бозның калынлыгы 10 см дан артыграк булганда); экстрим-парк территориясе; Гафиятуллин һәм Әминов урамнары киселешендәге мәйданчык; Ленин һәм Әминов урамнары киселешендәге мәйданчык. Районның торак пунктларында тагын 54 мәйданчык җиһазландырылган.
Утырыш азагында Гүзәл Хәбетдинова җаваплы хезмәтләр җитәкчеләрен шәһәр һәм районның барлык объектларында уяулыкны тәэмин итәргә һәм тәкъдимнәрне төгәл үтәргә өндәде.