Балалар бакчаларына түләү арта, өстәмә компенсация һәркемгә адреслы төстә биреләчәк

2014 елның 1 январеннән балалар бакчалары өчен түләүләрнең артуы халык арасында зур борчылу тудырды. Әлеге уңайдан интернет челтәрендә дә кайнар бәхәсләр бара. Тњләњләрнең артуы һәм гаилә кеременә карап компенсацияләрнең бирелњ тәртибе хакында тулырак мәгълњматлар белән бүген Татарстан Хөкүмәте йортында узган брифингта ТР Мәгариф һәм фән министры Энгель Фәттахов чыгыш ясады.

Билгеле булганча, балалар бакчалары өчен түләүдәге үзгәрешләр “РФдә мәгариф турында” Федераль закон кабул ителү белән бәйле. Әлеге закон балалар бакчаларын тотуның тәртибен сизелерлек үзгәртә.

Яңа закондагы нормалар буенча, баланы караган өчен чыгымнар өч төркемгә бүленә. Беренчесе – белем бирү хезмәтләре өчен финанс чыгымнары, анда педагогларның, тәрбиячеләрнең хезмәт хакы, уенчыклар, укыту-методик әсбаблар белән тәэмин итүгә финанс чыгымнары керә. Бу чыгымнарны республика бюджеты күтәрә. Коммуналь чыгымнар – муниципаль бюджет җилкәсендә.

Өченче өлеш балаларны караган өчен чыгымнар белән бәйле. Менә монысы - ата-аналарның балалар бакчасы өчен түләве. Бу өлешкә туклану, хуҗалык-көнкүреш, медицина хезмәтләре күрсәткән, медикаментлар,тәрбияче ярдәмчесе, медицина хезмәткәрләре, ашарга әзерләү блогы һәм техник персонал өчен хезмәт хакы фонды чыгымнары керә.

2014 елның 1 гыйнвареннан ата-аналарның балалар бакчалары өчен түләү тәртибенә үзгәрешләр кертелә. Яңа федераль закон буенча, беренче бала өчен компенсация – уртача түләү күләменнән 20 процент, икенче бала өчен – 50 процент, өченче бала өчен 70 процент күләмендә билгеләнә. 1 гыйнвардан яңа социаль ярдәм чаралары кертелә. Компенсация бер гаилә әгъзасына туры килгән керемнән чыгып билгеләнә. Министр әлеге компенсациянең һәркемгә адреслы төстә бирелүенә басым ясады. Компенсация бер түбә астында яшәүче гаиләнең җан башына керем күләменә бәйле: бер кешегә – 10 мең сумга кадәр; 10 001 сумнан алып 15 мен сумга кадәр; 15001 сумнан алып 20 меңгә кадәр. Җан башына керем 20 мең сумнан артып китсә, өстәмә ярдәм күрсәтелми.

Соңыннан министр җәмәгатьчелек арасында аңлату эшләре алып барылуын, министрлык сайтында мәгълүмат урнаштырылуын хәбәр итте.

Фәрдия Хәсәнова, “Альметьевский вестник” газетасы